我擺酒係喺紅磡灣天澄閣。其實嗰晚我好忙，都無乜接觸到啲經理，但係我老公就有啲意見，覺得某一位經理唔係咁好。嗰晚我哋有啲大頭蝦，忘記咗有一個朋友係食素，無安排素嘅餐單俾佢。我老公去同經理交涉，而嗰位經理咁樣回應︰「點呀? 要唔要呀? 係咁架喇！」佢俾人感覺好hea，啲態度係連啲兄弟姊妹都驚訝咗一下點解會咁。 另外，當晚有啲賓客可能高興得濟，見主家席有空位，就坐咗落主家席。嗰位經理就話︰「嗱，我唔理呀，總之主家席嘅位只可以加唔可以減。就算其他賓客啲枱有吉位都好，你都唔以轉返個人過去架喇。主家席張枱就再收錢，我唔理架喇！」我哋聽到之後真係呆咗，覺得佢啲態度唔好得嚟仲要唔helpful。呢位經理喺當晚婚宴先出現，唔係之前同我哋聯絡開嗰一位。當晚其實唔止佢一位經理，仲有其他幾位。 我哋之後都有向一直跟開嗰位經理反映返呢件事，但佢只係覆咗我哋一句︰「多謝你對天澄閣嘅支持！」。雖然無奈，但我都無再跟進呢件事了。我知天澄閣都好出名，不過如果有朋友問起我會唔會推介呢間，我就會提醒返佢哋婚宴當晚可能會有咁嘅經理出現，然後等佢哋自己決定返。

其實本身我都好有要求，擺酒最hit嗰啲哋方我都有睇過，但係因為我好鍾意冇柱同樓底高，而天澄閣就咁啱符合到我要求，而且我1月擺酒佢8月先啱啱新裝修完，個場裝修好grand，所以覺得呢度最適合。我係喺婚展度認識呢間公司，我之前都上網search過，咁岩佢哋有個counter。婚展佢哋係唔會收訂，淨係同你落左資料同聯絡電話，之後再約你上去睇個場，睇下滿唔滿意呀，揀菜式等等。 嗰時我同我先生、老爺一齊去睇，睇咗幾間之後一睇到呢間，就知道之前嗰啲全部都比唔上，所以即刻就決定咗喺度擺酒。雖然佢地點比較遠，幸好屋企人都接受到，而且咁啱當時哋鐵黃埔站又開咗，行十分鐘就到，同埋佢都有shuttle來往火車站同酒店，所以我個人嚟講覺得其實交通都幾方便，可以接受。而傾嘅過程，佢哋都唔會好hard sell。當時聯絡嘅sales係Wristeria，佢真係好好，由頭到尾都係佢follow up。 當晚處理座位等等嘅流程都順利。嗰度食物真係好食，雖然當晚我哋都冇得坐低食，係拎返房先翻熱嚟食，但都覺得好好味，我相信現場食應該更好食。佢哋有個甜品係芒果紫米卷，係有啲紫糯米包住啲芒果加啲cream，好好食，而且好特別，出面唔會隨便食到。另外，仲有個熱食嘅甜品，好似係蓮蓉酥，都好好食。其實每一樣菜式都ok。 場哋燈光，影音配套都ok，不過除咗個大screen，淨係得左邊有細screen，右邊就冇，如果兩邊都有screen會好D。因為D賓客坐喺左邊就望唔到細電視，只可以睇個大screen。不過其實佢台嘅screen係真係好大嘅，D賓客應該都睇到嘅。而場地好乾淨，我哋都好滿意。其實呢個場真係好好，所以佢哋好full booking，連平日夜晚都係有婚宴，前排想去食個dinner都食唔到。