其實本身我都好有要求，擺酒最hit嗰啲哋方我都有睇過，但係因為我好鍾意冇柱同樓底高，而天澄閣就咁啱符合到我要求，而且我1月擺酒佢8月先啱啱新裝修完，個場裝修好grand，所以覺得呢度最適合。我係喺婚展度認識呢間公司，我之前都上網search過，咁岩佢哋有個counter。婚展佢哋係唔會收訂，淨係同你落左資料同聯絡電話，之後再約你上去睇個場，睇下滿唔滿意呀，揀菜式等等。 嗰時我同我先生、老爺一齊去睇，睇咗幾間之後一睇到呢間，就知道之前嗰啲全部都比唔上，所以即刻就決定咗喺度擺酒。雖然佢地點比較遠，幸好屋企人都接受到，而且咁啱當時哋鐵黃埔站又開咗，行十分鐘就到，同埋佢都有shuttle來往火車站同酒店，所以我個人嚟講覺得其實交通都幾方便，可以接受。而傾嘅過程，佢哋都唔會好hard sell。當時聯絡嘅sales係Wristeria，佢真係好好，由頭到尾都係佢follow up。 當晚處理座位等等嘅流程都順利。嗰度食物真係好食，雖然當晚我哋都冇得坐低食，係拎返房先翻熱嚟食，但都覺得好好味，我相信現場食應該更好食。佢哋有個甜品係芒果紫米卷，係有啲紫糯米包住啲芒果加啲cream，好好食，而且好特別，出面唔會隨便食到。另外，仲有個熱食嘅甜品，好似係蓮蓉酥，都好好食。其實每一樣菜式都ok。 場哋燈光，影音配套都ok，不過除咗個大screen，淨係得左邊有細screen，右邊就冇，如果兩邊都有screen會好D。因為D賓客坐喺左邊就望唔到細電視，只可以睇個大screen。不過其實佢台嘅screen係真係好大嘅，D賓客應該都睇到嘅。而場地好乾淨，我哋都好滿意。其實呢個場真係好好，所以佢哋好full booking，連平日夜晚都係有婚宴，前排想去食個dinner都食唔到。

我係喺紅磡天澄閣擺酒，我哋本身圍數多其實選擇都唔多，又要個樓底高，所以呢間我哋覺得都幾好。我哋先前都有睇過好多間，不過始終都圍數多，我太太又唔係幾鐘意煌府嗰類，開頭我哋都有睇酒店嘅，不過又覺得酒店唔係好值，都要萬三四蚊，所以最後我哋就揀咗呢度，個價錢都比較合理。佢個location係爭少少，但係都明白好難取捨，又要平又要就腳，好難樣樣嘢都滿意。 我哋係直接上去搵佢傾，佢哋好似唔憂做咁，唔會好sell你啲咩，但係服務都okay嘅，解釋得好清楚，成個感覺就係「你okay就可以book」。因為當時佢都好full，可能想搵個星期六都好難。我哋係上年四月已經開始睇，係希望揀今年九月至十二月呢段時間，佢由舊年四月去今年全年其實係得番兩個星期六，仲要其中一個係重陽節前後嗰啲日子嚟。 服務我哋嗰位同事叫阿Wing，佢已經冇做喇，中間都轉咗另一位同事Apple。我哋好多嘢都係要靠Apple，例如當日安排係點樣嗰啲，佢都好幫到手。到咗big day當晚，我自己就冇咩感受，反而係啲賓客反映番俾我聽啲服務好好，無論係我同事或者係屋企人都話相當唔錯。當晚亦都有個女仔一路跟住我太太，佢都好幫到手。 但係有一樣嘢就係當日我造個backdrop唔知係咪太大，唔知係咪間公司同天澄閣夾得唔好，可能suppose天澄閣係有一個好大嘅屏幕喺後面嘅，但係我哋個backdrop太大，只可以用另一個前置式但係細啲嘅屏幕，點知當日佢就話前置嗰個壞咗做唔到，當日經理先同我講「唔好意思前面個螢幕壞咗，搞咗好耐都整唔到」，搞到我前台係冇螢光幕。雖然佢電視都多，但係好明顯有啲賓客係睇唔到嘅。不過呢樣decoration公司都有責任嘅，甚至decoration公司責任係大啲，佢應該一早要同天澄閣溝通好。