其實我當時係結婚一年前就已經開始搵～我仲以為都已經算好早，但啲商戶嘅期都係都好爆好爆！嗰時睇過幾間風格都唔係我鍾意，而咁啱呢間budget幾好個陣又有期，又影得幾靚，所以就揀咗。我鍾意啲無乜點photoshop過嘅風格，唔鐘意太唯美個啲，佢地嘅風格比較自然就啱我地。

佢地無論係攝影，定wedding planning方面嘅嘢，都會好樂意解答。而且佢地態度都好好，例如我地big day當日約咗8點，但佢地7點半就已經到咗，可以幫我地影下啲金器同場地～ 雖然嗰日好忙，無睇返啲相，但佢有SEND返段早拍晚播比我地，都幾符合我地心目中想要嘅嘢 ～不過我覺得如果佢地可以幫手搞到多啲氣氛就更好，因為我啲姊妹比較怕醜，又無請大妗姐，斟茶嗰時氣氛就有少少冷場。講返段片，我覺得佢地剪到好多感動同搞笑位，因為我見過好多早拍晚播都係比較安靜 ，但佢地拍出嚟就好touching，而且配樂都好好，有background music又好笑又感動，好多位我都好鍾意！

我哋喺Disney證婚嗰日就搵咗Tony做主攝影師。認識Tony係因為之前有朋友用咗佢，覺得佢影相靚而且態度非常好，所以我就自己約佢傾吓。上到去覺得佢都幾好笑同幾啱傾，睇咗佢一日嘅profile覺得幾靚，就搵咗佢幫手。我覺得佢唔pushy同hardsell，會同我傾吓聽我意見。

我覺得攝影師最緊要係可以同佢work得comfortable同埋可以帶動到大家影相，例如係我問佢會唔會好肥，佢會話哎呀PS啦，宜家唔好理啲嘢喇～佢會令到你會覺得好輕鬆！因為大家始終都唔慣對鏡頭，佢同你傾吓計講吓笑，大家影出嚟都會好啲。我覺得同佢work都好smooth，後期叫佢幫手執多一兩張相都唔介意。當晚食完飯之後我哋都搵咗佢同我哋喺Disney度影咗一啲相，佢都唔介意，啲相影出嚟都好好。另外，雖然嗰時我好早之前俾錢，到就快big day佢都會記得我，會提我叫我早啲休息，我覺得佢好有心。

嗰時我仲叫Tony快啲用菲林機，點知嗰時佢又唔用，最近佢先嚟用！雖然我都知佢嗰時未慣，但如果當時佢已經玩菲林機就好喇，我相信啲相會係更加靚同埋有感覺。整體好滿意，都開心我自己揀到Tony呢個咁好嘅攝影師同埋團隊。