我join咗佢哋酒店一個出門嘅package，包一晚太太同屋企人嘅套房住宿、敬茶杯碟、一晚停車位。

敬茶前我哋有request過想要多一套敬茶杯碟，怕斟茶時要洗杯會好花時間，但係因為太多新人，佢哋冇辦法提供多一套。雖然無影響整個流程，但最好可以比多一set。

第二日出門嘅時候，同時酒店有二、三十對新人一齊出門，好彩我哋九點早出門，好smooth，冇乜問題，但後來喺同一日出門新人開嘅WhatsApp Group度聽返其他新人講，佢哋出門嗰時等𨋢要等好耐，排曬隊。雖然已經有幾架𨋢，但晏少少出門嘅新人嘅流程就唔太smooth。

 

我同我老公係喺中文大學度識。拍拖嗰時我哋就諗如果結婚嗰時可以返中大影相就好啦，所以好耐之前我哋就已經諗住要喺HYATT擺酒，因為佢就係最近中大嘅酒店。 一開始有個Manager Vicky跟我哋跟得好好，不過之後佢就轉咗俾另一個似乎係佢嘅下屬去負責我地當日啲野，我哋就覺得嗰位下屬Carmen啲態度有啲問題。事源轉咗俾Carmen跟之後，我哋都有同佢開過幾次會。之後去到婚宴就到嘅日子我哋就再返去同佢見一次，finalize啲野順道睇埋場。嗰日我哋問佢婚宴嗰朝早草地附近或我哋預訂咗間Ballroom早上會唔會有人用緊。我哋覺得都係好簡單差不多都係一定會問嘅野，唔係特別為難佢，但佢就答唔到我地，同我哋講「我地呢啲未清楚住」。我都明白可能過咗幾日會有人想book都未定，但係我哋覺得佢起碼可以答「暫時都無，但之後會有我哋都唔肯定」，又或者可以幫我哋check吓留一留之類，但佢就好似完全無意欲幫我地查吓。之後因為我哋雙方家長為咗可以方便啲，婚宴之前一晚喺酒店book咗房住 (之前啲meeting已經同佢提過)，就想叫佢幫我哋check吓我哋會住邊間房。因為我哋請咗個大妗姐，佢同我哋講話男家間房應該要高過女家間房，所以我哋就想佢幫我地查下之前book嗰幾間房喺邊層，想佢哋幫我哋準備好先，唔使到時轉容易出錯，但佢都唔係好想去做咁。所以我哋真係覺得佢啲態度好奇怪，而且佢好多嘢都係俾model answer，無論係問關於房定係酒席食啲咩，佢都係話「我要幫你問返上頭先」或者「我要再幫你check返先」。主要黎講，呢啲野我哋已經唔係第一次同佢傾，係之前啲meeting度傾過。例如菜單上嘅魚係咩斑，菜係邊種菜之類，我爸爸媽媽同長輩就比較緊張注重食物同傳統嗰啲野想問清楚。咁正常黎講，佢之後啲會面就應該都要去問完啲嘢之後update返我哋。我哋覺得佢同我哋開會之前都無乜做過功課，無check過，同埋我哋搵得佢傾都預咗佢係幫到手，所以都覺得好奇怪。我覺得我哋其實都係好冷靜唔會去生事嘅人黎，不過我中途都傾到嬲嬲地唔想出聲。後尾我老公都忍唔住出聲之後，佢都係只係俾啲model answer我哋。然後因為HYATT酒席係會送枱花，我地就去左揀花，揀揀下佢就同我哋講「我哋今日個meeting就完咗喇，你地慢慢揀啦」之後就走咗，嗰刻我同我老公都呆左。我覺得你係跟我哋呢個婚宴就應該由頭跟到落尾到我哋正式離開，先算得上真係完晒，點知就係咁我地揀揀下花佢就走咗，得返我哋兩個係度揀完之後自己走。我哋真係有懷疑過佢係咪intern黎，因為佢連同我哋meeting都係素顏出現。嗰日之後一日，我先生就即刻再打去俾原本嘅manager Vicky去傾返，佢就即刻跟返晒我哋唔清楚嘅野，都好在有佢再幫我地跟。不過，其實嗰時我哋已經話想換過另一個人跟我地張單，佢哋都話可以幫我哋換，但唔知咩原因最後係無幫我哋換到。到我結婚嗰日，嗰位Carmen我老公都叫做有見過下佢，但佢suppose應該係跟我地個project我就完全無見到，佢直頭無黎同我打過招呼。我諗HYATT喺follow up project呢方面需要改善下。 我覺得我買你哋service又特登黎到傾，真係唔預算會係咁。以五星級酒店價錢出去再搵嘅話，我可以搵到其他更好嘅service。我真係即刻就覺得HYATT因為一個職員而令到我對成個branding感覺差咗。除此之外，HYATT又有好多唔係好flexible嘅野。例如book酒店房，我喺呢間酒店擺酒，然後之前一晚男女家喺同一間酒店book房住，應該可以計返落同一張單度(以我知道其他酒店係可以咁做)， 但佢突然間就同我哋講唔會計埋落酒席張單度。跟住我又諗住方便啲，就想喺HYATT嗰度間café度訂啲蛋糕做酒席前俾客人食嘅茶點，佢都要我哋分開俾。各樣野分咗單之後仲要額外俾service charge，真係勁奇怪。而且，咁樣對新人黎講真係好麻煩，因為已經好多野要顧仲要分咁多單。以五星級酒店黎講，我真係expect佢可以組合做一張好清楚嘅單俾我哋，所以真係好無奈。 另一方面，佢哋個新娘房真係好細同好窄。雖然之前睇場都知道，佢哋亦都話可以俾另外兩間房我哋用，但因為嗰兩間房又無鏡又無夾萬，真係用唔到。連化妝師都俾個feedback話間房咁細，又咁多衫，加埋佢哋嘅equipment，只係媽媽同奶奶都同時化妝已經無晒位，都未計我同啲姊妹可能要換衫。所以嗰晚其實我哋主要都係要上返我哋自己間酒店房先會夠位用。不過返酒店房有另一個問題就係要等電梯。其實我都唔算多衫換，只係婚紗同一套晚裝，加轉左一次髮型，但上上落落等電梯都幾晒時間。好多時拖裙妹妹已經有幫我哋等定電梯。雖然我唔知可唔可行，但其實HYATT得一個ballroom，每晚只有一對新人可以用到。既然酒店有6部電梯，如果之後用佢哋service嘅新娘有需要，或者可以考慮幫佢地哋hold起一部電梯，咁一定會幫到佢哋好多。又或者係另外嗰兩間房加鏡同夾萬，咁就真係可以變成一間較大嘅新娘房。 講返嗰一晚，其實其他野on the day，流程都係好好。我有啲親戚朋友係要食素菜都有被照顧到，而且佢哋都話好食。我聽到好多其他feedback都話嗰晚啲野好食。跟住場地音響各樣都非常好，我記得嗰晚講緊speech時講起我哥哥，當時我哥哥唔喺位，但佢個spot light都即刻轉到去我指住我哥哥嗰個位置。拖裙妹妹又非常之好，佢見我著得單薄又斟暖水俾我飲，我去邊佢都有跟住我，又同我講「呢個係我嘅職責黎架!」。整體黎講operation同跟住我哋嘅人都好NICE。