我見佢哋間公司咁大型，有咁多年歷史，對佢哋有信心，覺得影出嚟應該ok。佢哋有個open day畀我哋去參觀studio，覺得幾好就揀左。我影咗外景同studio，攝影師有問過我哋想點影，不過我哋無經驗，所以冇乜特別意見，都係交畀攝影師幫我哋決定。個package女仔包100款衫，可以揀三款，佢哋嘅衫選擇唔多，有啲會租咗出去，有啲款式比較舊，不過我都揀到。外景去咗山頂公園、香港公園影相，整體感覺幾好，我哋冇經驗影相，攝影師會提我哋點樣擺pose，化妝都幾滿意，好細心，化得好好、keep到，頭髮都好靚，我好欣賞佢哋嘅化妝師，佢唔會好hea咁幫我化妝，好仔細幫我執好每一part，全日跟足我化妝、補妝。👍🏼不過佢哋揀相方面比較嚴格，包嘅相唔多，要我哋取捨或者加錢曬相，想要多啲相加嘅錢都偏貴，係逐張計。不過除此之外，整體都算滿意。

見到Monalisa既 poster、價錢都幾吸引，就去問下佢地既details。Monalisa 可以影影樓、街景，自由搭配，最後我兩樣都有揀。佢影樓既風格有好多唔同既場景、主題，可以豐富到成輯相。我本身鍾意大自然，所以街景揀左獅子會同夜晚拍攝就揀左好熱門既尖沙咀1881去影。事前我有send d參考相比攝影師，傾過想要咩效果。最令人印象深刻係個化妝師，因為我少化妝，但當日個妝好自然，唔會好奇怪，所以好滿意😊 不過佢地影相既style可以再多d變化就更好，例如我地全日影相，雖然場景有變但style都係好相似，擺既pose都係好重複，感覺好接近，因為我地都係第一次影唔太識，如果有更多變化就更好。出黎相片我都幾滿意，係我地鍾意既類型，比較簡約、relax既style。拍攝過程攝影師都好貼心地指導我地點樣擺pose、企邊到影，令我地好快融入到氣氛，整體上都好好。衫既選擇方面都唔錯，因為我地揀左upgrade既款式，所以款式更多、更靚 😌性價比都ok，值得花多少少錢揀件靚衫去影。