因為我細個喺Monalisa度影過家庭相，同埋用第二間公司响沖繩影過但覺得唔ok，所以當我有second chance就揀咗佢哋，不過就喺行婚展度決定。

第一次上去試衫時，佢哋服務唔算話好好，唔算特別有耐性同細心，算係中規中矩。男裝，如果唔加錢就得啲好普通好舊嘅款，最後我哋自己帶衫去。至於女裝，加咗錢啲款就好stylish，唔加錢就真係五分入面得一點五分，加咗就有五分咁嘅差別。第二次再上去就已經係影相。

其實我哋揀Monalisa其中一個原因就係鐘意佢哋啲場景，Studio 景真係好多同埋好靚。我特別鐘意有一個場景係好似溫室玻璃屋～真係好靚！個攝影師都真係好好，佢比我更加執著，唔怕辛苦又好盡力咁幫我哋影。本身我哋個plan淨係包影室內，但係佢就唔怕熱，同我哋去咗個公園仔度影咗啲室外景。化妝師都好好，因為我哋試過另外一間個化妝師好差，完全唔聽我哋意見！但係呢個化妝師就好好，會俾下意見，又會聽我哋意見，同我哋商量下。影之前又已經問哂我哋要求同埋有咩concern，睇下要落咩角度配合返。

至於影完去揀相，佢哋開頭喺婚展嗰度同我哋講其實呢個plan已經好足夠，但係影完佢哋又同我哋分析其實咁樣係唔夠。雖然又未至於hard sell，都純粹係分析，又未至於唔加錢就黑面，但係如果佢哋一早同我哋講清楚啲，我哋會感覺好啲。除此之外，整體出嚟效果都算滿意～

我地最主要想同狗狗一齊影pre-wedding，所以係婚展嘅時候見到Mona Lisa嘅相就覺得會好適合。因為佢地本身studio已經有花園，好方便，唔驚有其他流浪狗行，又唔驚係街影唔方便。另外佢哋仲有好多decorations，唔使自己預備。基本上我地好快都決定左，所以佢地都無點sell，而且個溝通過程都好順利好快。 我地主要係佢地嘅花園度影，仲有係公園同埋入面其他場景度影。我特別欣賞佢地嘅化妝師！佢化出尼好自然，但係又唔會覺得好plain無咩色。好深刻化妝師佢問我影相嘅時候我會點樣笑，然後佢就按住我笑嘅樣去幫我化個嘴，非常細心！攝影師都好好，有同我地溝通吓，了解我地嘅期望係點，攞啲angle都好好。同埋佢地都好盡力咁氹我隻狗狗，非常落力咁引我隻狗狗望鏡頭，嗌到最後仲連聲都無晒！ 去到我地去睇相嘅時候，我地收工去到都已經近6點，就算睇到接近8pm佢地嘅收工時間，甚至係就黎過鐘，佢都無催又無俾咩壓力我地，所以揀得好舒服。而且我地就咁睇簡單執左色嘅相都已經好滿意，覺得啲相都好自然，係我地想要嘅野。