最初我哋覺得Mona Lisa好耐之前已經有，style可能會較為老土，但出乎我事料，同事喺Mono Lisa 輯相竟然影得唔錯，而價錢亦可接受，所以我哋覺得可以一試！佢哋九龍塘個studio剛剛翻新過，多咗啲韓風同簡約風感覺，室內景有好多選擇，個景影足一日都ok！ 最初serve我哋嘅Sales叫Cindi，佢好好嘅，幫我揀咗好好嘅攝影同化妝。不過揀裙當日就有少少不愉快，因為我一路揀，發現裙嘅選擇原來唔多，睇啱嘅又冇期或者冇size，咁佢哋就sell我叫我upgrade，可以多啲選擇，但我嘗試睇埋upgrade 啲款都覺得唔係真係好多款！而且當日幫我揀裙嗰位小姐態度唔係咁好，冇咩耐性，好似趕住收工咁！同埋佢講嘅說話令我同我朋友甚至我老公都覺得唔係好順耳，例如會話︰「我哋冇你size㗎喇！」其實當日我見到隔離有另一個客人揀緊裙，我覺得serve佢個女仔啲advice好好，對比之下就覺得服務自己個位真係麻麻，冇咩比過意見我。最後我夾硬揀咗三條裙。 嗰日之後，我update返Cindi有件咁嘅事，佢問返其他同事都覺得服務我個女仔個日講說話有啲奇怪，於是佢叫我再上多去一次，搵其他同事同我試衫。咁我個日未去之前佢哋已經幫我stand by揀好咗啲啱我嘅款，咁我再去的確可以重新揀到一兩條裙，而且出嚟個效果都唔同，最後都挽救到成個體驗！ 攝影當日，攝影師好好，本身我哋都冇諗住去外景，但佢話橫掂package包咗就唔好浪費，所以最後去咗城大影外景。本身都諗住影少少，影下個門口咁就算，點知最後比預期影多咗好多相。其實我影完個陣有啲心大心細，因為覺得可能有其他景嘅風格比較適合自己。但係最後收相個時，啲相嘅效果又OK喎！啲相影出嚟我唔覺得老土，啲妝亦覺得自然，啲景影出嚟都有人問我哋係唔係喺外國影，我同佢哋講喺Mona Lisa影，佢哋都有少少跌眼鏡！我覺得幫我哋影相嗰位攝影師真係好有經驗，佢啲相嘅角度攞得好好，有啲相未photoshop出嚟已經用得！最後出嚟嘅相真係幾靚，就算好細個corner影出嚟都可以好有效果，好神奇！

因為我哋搵pre-wedding嘅時候同婚期都幾近，好多公司都冇期，所以選擇唔係太多。去到婚展，發現好多pre-wedding都係去外國嘅package，我哋唔係咁啱。之後我哋見到Mona Lisa覺得唔錯，幾啱我哋，所以就join咗。 Joyce Ma好有耐性serve我哋， 對答都好溫柔，好詳細講解啲細節，解釋得好清楚！試衫時，都見到有啲我鍾意嘅款式，不過啲收身裙款嘅腰位比較窄，我全部都試唔落，唔係好啱身，所以我試試吓都有少少唔開心......本身佢哋建議我不如著啲拋啲嘅裙款，但我自己就唔鍾意。我pre wedding包3套婚紗，但因為我本身只係鍾意簡單收身款，所以其實真係唔係咁多選擇。不過我揀完衫之後，見到有啲新人試啲我好鍾意嘅外景衫，而呢啲衫之前我揀衫時冇見過，我估可能幫我試衫嘅staff唔係咁清楚我想要咩掛。。。另外，個package送咗係送一件禮服，不過我都唔係咁揀到，其實如果佢地再有多啲款就好喇！ 輯相我哋喺去咗九龍塘studio、石板街同埋中環碼頭影，決定地點前佢哋有俾sample我哋睇咗先，我哋覺得ok就跟住佢呢啲地方影。當日嘅攝影師都唔錯，幾搞笑，可以帶動到氣氛。我最記得係去石板街，因為有張sample相我哋一睇就好鍾意，張相係喺一間喺石板街一間英倫風格既髮型屋度影嘅，真係好靚，所以我話我哋要做同一個動作、影返同一個感覺！而拍攝時，攝影師佢哋都好有耐性，會用唔同嘅角度幫我哋影，睇得出佢哋係好有心！