我哋搵佢地影幾個景點，去咗馬灣、山頂公園同埋中環影夜景。我哋好鍾意山頂啲草地同埋花園，又唔多人，然後就順路去中環影夜景，影到成7點幾先走。另外就係我哋嗰日山頂好大霧，陽光可惜麻麻地多陽光，不過始終係睇個天，都算okay既。攝影師比較文靜，都唔算話會好多嘢講好多交流咁，不過化妝師就好快手，而個妝出嚟都好滿意。 我哋去返佢地studio度揀相，係佢地個mon度睇張張都好靚，但放大就麻麻，可能因為係睇thumbnail，所以如果張相俾原size我地睇就更好。到出嚟相既質素都okay，個style係比較曝光啲嗰種，例如係室內白色玫瑰花背景，因為係白色底所以一曝光打埋去都張相都會好光。成個攝影都唔錯，算係品質同價錢都合理。

我哋喺婚展join Mona Lisa，因為優惠多啲，送多啲相，其實去婚展當日我哋都有睇過其他攝影公司，不過其他公司通常只係包一個室內同一個室外景，而Mona Lisa嘅package係包兩個外景再加室內studio，所以我哋最後揀定Mona Lisa。當日婚展係Suki serve我哋，我覺得Suki都幾nice幾funny，我哋都主要問返佢package包咩嘢，而佢都冇特別sell我哋。 喺拍攝前，佢哋同我開過一次會，開會嗰日佢哋有俾啲明星影嘅相版我哋睇，亦介紹返啲拍攝地點。然後佢哋就根據我哋嘅喜好，介紹去邊啲景點(例如海邊/樹木景等等)，佢哋所介紹嘅景點真係唔錯！其實我自己反而prefer唔用明星，因為會覺得啲相係用咗明星所以感覺特別靚，反而用返普通客，見到唔係明星都可以影得靚，我會更加欣賞。而約拍攝日子方面，佢哋都好容易遷就到我哋想要嘅日期，唔會話太難約。 拍攝嗰日，我哋去到佢哋九龍塘個studio集合，我覺得個場地好靚，有好多唔同場景，可以用盡佢哋每一個角落嚟影。佢哋outdoor有4、5個景，閣樓又有另一個景。我特別鍾意閣樓，行上樓梯本身唔知係咩，原來係佈置到好似書房咁，擺咗張梳化喺度，後面佈景都幾真。攝影師教我哋擺嘅姿勢動作都好自然，每一刻都有提我哋，點樣先係最靚，又會講吓笑引我哋笑。 我哋影完大概一個月可以揀相，負責嘅同事其實幾nice，不過佢坐咗喺度我哋點都會有啲壓力。揀相時，佢都有俾意見我哋，不過其實我哋有時想自己研究吓睇吓慢慢揀。我個package包80張相，因為啲相都好靚，所以好快就揀到。我哋知道佢本身package係包相薄同相架，但到揀相時先知包嘅係最普通嘅款式，原來除咗基本款式，佢哋仲有好多唔同選擇，不過如果想enlarge又或者要其他特別款都要加錢。如果我join package時佢哋再講清楚會比較好，等我哋有個預算！ 最後final product quality都ok，不過其放soft copy嘅usb就有少少問題，我哋懷疑佢哋未save完啲相就拎咗隻手指出嚟，所以有啲相放唔哂入去，有啲就load唔到。我哋即時聯絡返佢哋follow up，但之前follow我揀相嘅同事放咗產假，就交咗俾另一位同事跟，而接手嗰位同事都佢好好，幫我mark低哂所有嘢。不過過咗一段時間，佢哋都未有人覆我，所以我再打返去問佢哋，佢哋就話我搵開嗰位同事又調咗去第二個department，所以就冇人再follow我啲相。咁通知咗佢哋之後，佢哋就立刻安排俾返啲相我。我都明白係人手調配問題，但新娘臨近結婚都忙，如果成個程序可以再smooth啲就更加好！