Billy喺我老公嘅好朋友黎，都話佢影得好而都當我哋結婚都諗住搵佢幫手。雖然佢同我老公喺好朋友，但我哋本身就同佢都唔算熟，所以一開頭上去同佢傾見佢都無乜笑容，但後來熟咗之後就覺得佢都好nice，始終warm-up咗大家就好傾喇。Billy個package係無包埋衫嘅，但係當我哋去搵衫既時候佢都會俾啲好好既意見我。例如佢會話如果已經租咗一條婚紗，另一條就唔好又租啲婚紗既款，可以租返D晚裝或者其他裙款。記得當時去揀衫都會即刻send啲相俾Billy問下佢意見先，真係會等佢話OK我哋先決定租。 我哋輯Pre Wedding好特別，因為係分咗二次影既，一次响山頂，一次响石澳。影多日既原因都真係要多謝Billy，事關第一次影既時候個天越影越黑，後來天氣差到真係唔可以再影同埋真係影得好少相，於是Billy就主動提議話不如影多日。聽佢講話可以影多日我哋即刻舒服好多，覺得唔使咁趕而且仲可以換多套衫！當時記得第二次影嗰時笑容真係靚過第一次好多，一啲都唔覺得攰。可能第一次真係太大壓力，所以我哋真係好感謝Billy同佢成個團隊，肯幫我哋出黎影多一日。因為初時我哋傾嗰時都知道只係包影一日，所以好感激Billy自己主動提出幫我哋忙多次。 第二次影嗰時都有包埋上佢個Studio度影室內相。大約2點左右開始影到3點幾左右先去石澳。我哋嗰日仲有帶埋我哋隻好得意嘅白威狗仔「飛雲」一齊去影！Billy佢影人像就肯定多啦，估唔到佢同飛雲都合作得好好喎。佢又唔會話同飛雲玩到好癲搞到佢定唔到落黎影相，而係同佢玩得好calm。影相時又會叫吓飛雲個名或者用啲玩具引吓佢望鏡頭，所以影出黎嗰啲相都好靚！有佢個得意樣嗰啲相我哋都好鐘意，所以我哋响飲嗰度個門口用嗰張相都係有佢同我哋一齊影嘅相！咁唔止飛雲啦，講返我哋，佢都有教我地擺咩pose去影或者望邊度先啱。例如佢會舉高隻手，叫我望向嗰邊或者佢會擺一啲動作叫我哋跟住扮返。然後佢又會好encouraging咁同我哋講話「啱喇！hold住呀！宜家呢個咁樣好靚！」嗰啲。當然我哋梗有啲時候真係做唔到佢教我哋嗰啲動作啦，但佢都唔會話我哋嘅，佢會好有耐性咁教，如果真係做唔到就叫我哋轉做第二啲pose，唔會勉強要我哋一定要做到。 佢做嘢都真係好快手，大約第2日左右就俾咗一至兩張相我哋睇吓個效果。之後大約一個月多啲就可以上去揀相，然後一個星期多啲佢就幫我哋執埋揀咗出黎嗰啲相。其實我哋嗰時都幾趕嘅，因為7/8月影，10月就擺酒，所以真係好多謝佢咁快手，嗰度真係都幾多相要處理！。我哋prewedding相最後揀咗29張落album，但佢幫我地都執咗大約100張。其實佢都無set上限話只可以揀幾多張，都由得我哋自己揀。不過張張都好靚，我哋忍手揀先揀咗大約100張出黎。而我哋揀咗出黎嗰100張相，就算無入album嗰啲佢都有幫我吔執（我諗如果我哋揀咗500張可能佢都會幫我哋執晒佢，不過我哋當然喺唔會咁做啦！）。 到攞本album，我哋未打開就已經覺得好靚，因為封面就係我好鍾意，我哋兩個响藍天之下拖住手嗰個shot。講返當中都有少少美中不足既地方就係我留意到我老公啲銀包同電話响個衫袋到浮咗個形出嚟，見到個衫袋位漲起咗。其實都係minor嘢，但我諗當時如果可以提吓佢清咗個袋就會更好喇。 而當中我最印象深刻嘅就一定係我哋同飛雲一齊影嘅「全家褔」，我時不時睇返都覺得好靚好滿意。