當初喺婚展度有啲講國語嘅同事叫我地過去睇睇，其實我地都唔知咩公司。去到Reception坐低之後Fiona就招呼我地，比咗好多相簿我地睇，又介紹下佢地影相嘅概念係點。佢地都好有多選擇比我地隨意去揀，亦好細心咁解釋咗好耐，都傾成個幾兩個鐘。過程中無乜點講個Package要幾多錢，去到知道我地鍾意先講，但又唔係話sell我地。佢地公司會根據每個couple嘅故事去做一本相簿出嚟，見到呢樣好似同其他公司唔同，所以我地就比呢樣嘢吸引咗，都係我地會想要嘅嘢。我地又覺得Fiona講嘢好踏實，唔係硬去sell自己，唔會令我地覺得好大壓力，所以我地就決定用佢地～

本身其實都無打算去外國，所以就留返喺香港度影。我地揀咗西貢，因為老婆係嗰邊住，就比較有回憶，同埋嗰邊嘅風景就好啲，感覺上會適合影結婚相～

當日攝影師同化妝師都好好，好nice！！攝影師Andrew好好，因為始終我同老婆都唔係好識影相，所以都覺得佢lead得好好。佢時不時都會叫我地自然啲，帶動到我地做啲動作，又唔係好惡嗰種攝影師。到食飯嘅時候，佢都只係咬個三文治就算，見到佢真係好勤力，而且佢影相拎嘅角度同位置都好好！佢都幾清楚個地點有咩地方可以影，就唔會出現去到先摸索嘅情況，做足功課！影相當日我地覺得好舒服～好似跟團咁哈哈！

化妝師嗰度我地就試咗兩款眼睫毛，so far都覺得ok。因為影pre－wedding嗰時就覺得隻眼有啲深色，不過佢就話影相個效果係需要深色啲，咁就相信佢啦～但係影到出嚟我地都係覺得深色咗少少，覺得如果可以清啲就好啲，於是就同佢講結婚嗰日想清新少少，咁去到結婚嗰日個妝就好咗好多！其實佢都好專業嘅～只係可能我地當初溝通得唔好，又唔係好識，所以先會出現呢個情況～Big Day嗰日佢都化得好好～而且佢唔會厭煩，態度好好！！

揀相嗰時其實爸爸媽媽都有一齊去揀， 四個人其實有不同意見～Fiona都好好，見到我地4個人stuck咗係度嘅時候，就會提返我地個相簿嘅目標係點，雖然啲相都係靚，但係如果重點唔喺度就要飛咗佢～Fiona亦都唔會催我地快啲或者sell我地再加相～ 我同老婆其實又唔係有好多特別嘅回憶，所以就唔係好有故事性，相簿出到嚟就好似唔係好出到我地想像中嘅原意，即係我地由幾時喺邊度相識，到一直以來發生嘅嘢。不過亦可能係因為我地講唔出一啲好Critical嘅嘢，所以就做唔到嗰個效果～

租衫嘅選擇同款都好靚～佢地好唔介意我地係咁試，亦都唔會介意我地經常上去試， Fiona間唔中都會話有啲咩新衫叫我地去試，亦都從來唔會怕煩。不過男仔嘅款式就比較少，因為我身高184 所以好多時都唔啱size會吊腳。我自己pre－ wedding套西裝其實就好夾硬咁著落去，即係無話好fit身先去影pre－wedding就覺得美中不足，就係因為之前度過身就信佢，所以就無話再去度，但結果就真係唔得，連坐低都有啲困難，所以到big day嗰套我都有認真啲去度。雖然最終都要經過幾次request先做到，不過big day嗰套就好好。

Big day攝影佢地都幾專業，總共有3個攝影師。原先我地傾好影11個鐘，由8:30去西貢到夜晚11:00完成，不過我地就影得耐咗，最後多咗1個鐘，所以就交多＄3000。雖然佢有講過run down 同提咗我地關於over time嘅錢，不過我就覺得如果可以講得再清楚啲會好啲～因為我地覺得呢個加班收費有啲太貴，可能中間又無乜時間比攝影休息，所以收呢個數。希望佢地可以flexible啲就更好，始終當日都預咗係全日幫我地影，而且我哋又已經比咗一舊錢嘛。但係我覺得佢地都係專業嘅，中間嘅過程都係好落力去影。

朋友介紹Chris Ling俾我地識，話佢地影開D自然style。我地上網睇過相，都覺得幾好，就諗住去埋婚展睇下booth，睇下啱唔啱。我地去婚展都有再比較過其他，我地睇完之後覺得Chris Ling都算中高價，但係性價比高，真係俾到嗰個質素，同埋佢地都好適合我地嘅風格。我地喺facebook度contact咗Yuki，佢approach都係好nice，有咩問題都會幫手。另外，最重要係我地8月底先去睇，但係想9月就去布拉格影，佢地又即時俾到個期我地！啲衫又幾好，又係自然風格，所以就決定咗佢地～

之前預備嘅時候，我其實自己淨係諗到可以去天文台嗰度影相。佢地好好，其他嘅都幫我地plan好～跟住上去到試衫，我本身無咩fashion sense，都唔知咩衫啱自己，Yuki就咩款都攞咗D俾我地試。我試咗6-7條，最後揀咗3條攞去。佢又幫我pack好哂，咩都唔使我煩，好幫到手。之後大家都開咗WhatsApp Group方便溝通，佢地會主動通知我地D時間同安排。

化妝師都好好，好細心，好專業。我自己好少化妝同埋我又單眼皮，佢都好有心機幫我整靚個眼妝，同埋佢又有幫我整多D造型，換多D髮型，都好盡力！除咗化妝師，仲有一個幫手跟足全程，都係跟得好好。攝影師就係新加坡同事，會講下笑，指導下我地D動作點樣擺，都係好細心。

揀相嘅安排我好欣賞！因為好多公司都係俾你就咁喺電腦度揀同睇，但係佢地就真係會哂咗D相出嚟俾你慢慢諗同編排要咩相，嚟個安排我真係好欣賞～