其實喺婚展見到Chris Ling嘅作品，我已經一見鐘情！我鐘意佢哋嘅style係simple elegant，比較簡單啲，唔會好似其他嗰啲太濃妝或造作。另外，佢哋啲員工態度好好，唔會好pushy，只係話啲詳情俾我知等我做決定。到我想落單時又無話一定要join大package，叫我join最少嗰個package都可以，反而係我自己又唔想自己去租衫，就全部嘢都喺佢哋度處理。 而confirm後我上去揀咗幾次衫，佢哋都俾我隨便試，我覺得佢哋好有耐性，又唔會試試吓有啲衫係要額外收錢。而我搵啲相俾佢哋睇我想要嘅style，佢哋亦盡量配合。 我哋輯Pre-wedding室內外都有影，朝早室外，下午室內就連埋我隻貓一齊喺studio度影。我都好多謝佢哋俾我帶埋我隻貓一齊影，而且佢哋都handle得好好。Photographer Andrew態度好好又細心，同埋佢好專業，好識教我哋pose，令我哋成個影相嘅過程都好舒服，又好快影到啱嘅相。另一方面，我覺得佢好flexible，好肯聽client意見，我同佢講我鐘意咩類型嘅景，佢都俾到好好嘅recommendation我。例如我同佢講我想影沙灘景，佢就提議我去赤柱海灘影會無咁多人。而返studio前，我話想影幾張有電車背景嘅，佢又安排到同我哋去影埋先走。同埋佢真係好挨得，成個影相過程，佢又要扒底又成身流晒汗都無怨言。 揀相方面都好好，佢哋啲同事個個都好細心，態度都好nice，所以成個pre-wedding過程都無唔愉快嘅經歷。完晒之後我都特登去婚展探佢哋！真係好多謝佢哋令到有好好嘅服務體驗。

我哋係去婚展搵到佢哋嘅，盲中中咁行咗好多轉，經過咗幾次Chris Ling個booth，見到佢哋啲衫好靚，第一次都已經俾佢哋display吸引咗。對比返其他booth嘅display，佢哋無論質料同設計都靚太多，所以我哋行咗幾轉，你都知如果婚展一坐底傾就坐底幾個鐘，我哋最後都覺得Chris Ling最靚，所以返返轉頭同佢哋簽contract。佢哋銷售手法都好自然，唔會話好harsh好chur你，都係show返佢哋嘅作品俾我睇，而我哋有咩取向，佢哋都會盡量幫我哋搵返有冇我哋想要嘅style同idea嘅現成嘢俾我哋睇到，睇下啱唔啱我哋心水，都好smooth。 我哋比big day早咗兩年睇，plan咗下一步，諗住影一輯留倩影先，到big day再影。我哋最後defer咗好耐，真係要讚一讚佢哋，我哋推遲到過咗張約嘅時間，佢哋中間有搵我嘅，但係我成日都推遲，最後佢哋瞭解到情況都俾個特別嘅allowance我可以推遲多一年。 我哋輯相係香港影嘅，講到事前preparation佢哋真係非常之好，跟佢哋影之前，其實我哋去過韓國影一轉，好似食快餐咁，去到朝早揀衫，影完成日就算，一日入面搞哂所有嘢好攰好辛苦。去到同Chris Ling影就好唔同，佢早一兩個月已經同我哋傾想影咩嘢，想啲相有咩故仔，衫就早成兩三個月已經俾我哋揀。所以我哋搞哂衫，傾埋個故仔點行，講埋哋點喺邊度，攝影師再俾feedback話啲哋點有咩可以影，多數都係聽咗我哋意見先，唔會話聽咗個哋方冇故仔冇內容就唔去，佢哋都會即刻上網search，跟住覆返我哋有咩可以影，相當好。佢哋就係咁樣幫我哋plan哂故仔揀哂衫，影嘅時間就好smooth，冇好似去韓國影咁辛苦。 影相嗰日，我哋首先喺天水圍搵咗個比較清靜啲嘅輕鐵站影。之後去就咗上水火車線隔離(近羅湖)嘅東江水管上面影，而家都好多人都喺呢度影。之後去咗大埔鹿頸。呢啲哋點係我哋提出，因為想有返我哋自己故仔。其實佢睇過呢啲景點之後，佢哋有張form俾我哋填，就會寫埋點解我哋揀呢個哋方，跟住就幫你砌返一個類似你哋嘅愛情故事咁樣嘅模式。會有啲扮下拍拖，結識啲相，去到鹿頸又會影啲禮服相，一步一步嚟，好似拍拖諗結婚，跟住結婚啲相咁樣，成本相薄出嚟就好似一個故事咁。 好深刻嘅係佢哋幫我哋去到上水水管其實要爬高爬低，同埋個水管都離哋幾高下，好似獨木橋咁，佢哋一啲都唔介意幫我哋爬上去睇咗景先，拎住咁多器材幫我哋搵咗好耐，全靠佢哋咁先幫我哋搵到好靚嘅位幫我哋影，本身我哋都冇諗到會拎到啲咁靚嘅角度，都係因為佢哋咁辛苦行嚟行去先幫我哋搵到。因為我皮膚唔係太好，化妝都特別幫我哋補妝，同埋佢啲遮瑕技術都相當厲害，救咗我一命。 其實佢哋事先約咗一日揀相，佢會將佢哋覺得影得靚嘅相哂咗出嚟先，分哂類分哂場景同故事環節，逐疊逐疊放喺度，去到就好似開會咁逐疊逐疊揀你覺得靚嘅相，再好似偵探故事咁砌返個故仔出嚟，揀邊張放邊度點樣排版都講哂俾你聽。因為有實體相你可以睇到色差，爭好遠，因為光暗度個個mon都唔同，睇相就係最接近你本相薄出嚟嘅實物，我覺得呢一點真係冇得彈。同埋你可以即刻可以用筆去圈要改既哋方，例如手臂呀，遮瑕啲位，咁就一定唔會有誤會。 而最後嘅製成品相當有份量，好好質料！(本嘢差啲壓爛咗我屋企張櫈^o^)，證明真係用料充足，佢個亞加力水晶膠面好厚好靚，同埋紙質都好靚，big day成晚擺出嚟俾人睇都冇爛冇刮花，色差同我哋喺佢哋度睇嘅冇咩分別，同埋佢講完排版嘅位出嚟效果都係match哂，唔會話貨不對辦。 如果佢哋showroom可以大啲，唔洗Booking book得咁辛苦就更加好喇！因為佢哋太旺，雖然其實showroom已經好大，但係太旺，所以想再約佢哋唔係咁易，要互相就時間。不過，一定係影得好先至會咁旺嘅！