我喺婚展睇到呢間公司嘅相薄，已經覺得同我想要嘅效果好相近，因為佢哋style比較自然。而且有一點真係好吸引我，就係呢間公司D相係玩story。佢哋唔似有D攝影公司鍾意以影景為主，佢哋主要係影人，呢樣嘢我好buy，因為我覺得話哂都係婚紗相，梗係影人緊要D。其實喺婚展我哋都睇咗好多公司，台灣、韓國、影郵輪都有，都幾吸引嘅，但係我同先生討論過都係覺得婚紗相最緊要係耐看，所以覺得呢度D相都幾耐看，個style又啱我哋，就即場落訂join左佢哋service。 我哋係15年12月影嘅，因為佢玩story，會拍啲故事嘅野好似係我哋點樣相識啦，求婚跟住先係婚紗。佢suggest我哋準備一套情侶裝，同埋叫我哋準備啲道具，例如︰汽球或者對我哋嚟講有meaning物品。 我哋拍攝當日係直接喺佢哋studio度集合同化妝，之後就先喺studio入面影indoor景，影完先出去影外景，外景後再返嚟studio補影。嗰日由朝早8、9點影到夜晚10、11點。佢哋真係幫我哋影足full day，真係non-stop。 交通方面佢哋一早幫我哋call車，費用就我哋自己俾；因為佢哋話司機熟路，平時都係搵開佢，我就費事自己再出面搵，始終搵生不如搵熟。至於食飯方面，佢哋之前都同我哋講咗係會影到天昏哋暗，所以嗰日係冇lunch/dinner hour。但嗰日一早預備左麵包，零食同點心，我哋都係換景嘅時候一齊喺車度食。 影之前我哋開會傾過去邊度影，佢哋都有俾意見我哋，我哋就去石澳同山頂影。最深刻係山頂喺個涼亭度影嘅相，個構圖好靚，同埋咁啱有夕陽，出嚟效果好好。另一個深刻場面係，我其實一直好想影倒影嘅效果，我哋去左石澳影嘅時候，攝影師Andrew為咗幫我影倒影嘅效果，直頭成個人攝咗喺兩塊岩石中間，就係為咗拎個角度。我哋化妝師影低呢個場面俾我睇，我覺得好好笑，同埋俾我感覺真係feel到佢搏命，令我好感動。 之後，佢哋約返我哋上佢office度揀相。揀相時，佢會俾suggestion我哋，但最後揀唔揀都係up to我哋，由我哋決定。因為佢哋本身個相薄係玩story，佢哋會建議例如某個background影嘅相，一係就成個background都唔好揀，一揀就起碼揀兩、三張，咁樣出嚟個構圖會靚啲。因為我自己覺得一生人都係影一次pre-wedding，又化左靚妝，著住靚婚紗又有靚景，好似張張都好靚，好難揀，反而佢哋就幫我篩走啲相，完全冇hard sell 我叫我買多啲相。揀相後，，佢都有俾過排版我哋睇，有俾我改同執，到我confirm左排版就出個相薄。影完到拎得大概十個月時間，不過我冇特別追佢哋，因為知道自己好多時間。而最後相薄喺big day前幾個月整好，我哋親身上去拎，睇過哂冇問題就拎走。我哋一打開，就覺得好靚，真係自己想要嘅嘢，而且更有story-telling嘅效果出到嚟，我哋覺得好滿意！

我哋都算好另類，當時都只係見嗰時身材夠瘦，就諗住影輯婚紗相先，記得當時都未話真係會結婚～ Anyway，我哋就去咗睇婚展，仲要係得返一個鐘完展先入去。行咗陣，睇咗好多都睇唔啱，都差不多諗住走。後來行去另一個area，睇到一個booth本sample相簿好似幾啱style就入咗去睇。成個過程由傾嘢到落單都係由Fiona負責。佢同我哋講佢係一個人喺新加坡過嚟，而我後來先知原來Chris Ling嗰brand係新加坡都幾出名。成個傾嘢嘅過種都幾舒服，而雖然佢哋價錢唔係最平，但係我覺得都好合理。傾完之後，我哋就買咗一個海外婚紗攝影package，當時都未confirm話去邊度影，後來都諗咗幾個月，先再決定去巴嚟度影，我覺得佢哋都算好就我哋，好容易話為。 我哋15年9月confirm package，到7月26日先喺巴嚟影。由我哋買到影差不多成10個月，大約到final嗰1個月先開始「密集式」傾細節。不過因為我個人比較緊張，所以期間我自己都做好多research，show啲相俾佢哋睇我想要啲咩。其實後來我都知原來normally都係1個月前先再finalize嘢，搵我哋開會，諗返我自己都真係太緊張喇。另外，因為佢哋仲有做婚紗設計，由9月到7月期間我真係上過去超過廿次試衫，我覺得真係要試到最完美最啱嗰件先影，絕不能馬虎！ 佢哋好細心同我傾啲相要點影，當時好早前我講過吓想喺馬路度影、想有張相係披住一件外套同埋想有攞住個mask影。但係到後來我自己搵唔到啱嘅外套，就都諗住放棄呢個念頭。估唔到後來去到巴嚟嗰時，化妝師居然記得我早前開會時提過既呢個shot，佢好細心地提出不如用我老公件褸嚟影！我真係好impress，因為佢哋真係有將我想要既detail擺响個心裡面，有記得我既要求，而就算係我自己搵唔到啱既外套都會幫我滿足到！之後就算時間好緊，佢都有提我要快啲去馬路度影。Mask方面我prepare咗一個，佢哋都prepare咗一個。最後我兩個都覺得好滿意，兩個都有用嚟影。整體嚟講都有好多部分係我哋自己有plan同諗嘅，因為本身我同我老公都好有要求，我啲朋友都有講過話佢哋自己去搵Chris Ling都未必會出到一樣嘅效果。不過我覺得其實係互相配合啦，大家摩擦到火花，真係好似一個團隊咁。化妝一定要讚，攝影師既技術同角度都好好，都好細心，真係有記住你想要嘅嘢。其實婚紗攝影真係無話肯定靚，化妝、style都係要搏吓啱唔啱配唔配合到。不過估唔到嗰日真係好順利，又唔辛苦，好enjoy成個影相嘅過程，而且睇相之後人人都大讚我個妝化得靚！ 我哋8月返嚟，11月就結婚，佢哋都話相一定搞得掂唔會有問題，一定起到貨俾我。我覺得佢哋好專業同快手！上到去，佢哋已經準備咗2百幾張相俾我哋揀，然後又有一個專門負責排相簿嘅designer同我哋一齊處理本相簿。個package原本包40張，但因為啲相實在太靚，我就加錢加到70張。佢哋竟然自動提議幫我造成2本相簿，仲將啲相串連成一個故事。每一本相簿又唔限我頁數，某啲相又幫我安排做一整頁，唔會只係為咗塞晒我哋揀嘅相入去而，而真係為咗幫我哋做到最好嘅效果。 我老公其實都影咗好多花絮，upload咗之後好多朋友已經覺得好靚。而到我哋睇到成品後，真係覺得張張都好靚，完全喺我哋想嘅嘢！