當初認識Cherriella Wedding係因為朋友介紹，我見到我朋友嘅婚禮啲相幾靚，跟住就問係邊間。之後我自己去咗佢個Facebook同website度睇，覺得佢個portfolio我都幾啱心水，所以就打去問。 第一次見佢嘅感覺就覺得佢係好殷勤，不過佢可能因為好忙，所以要好夜（九點幾）先見佢。我哋上到去主要都係睇番佢嘅portfolio，聽吓佢介紹唔同package同埋雙方可以點配合。因為覺得佢都做到我想要嘅嘢，所以就決定用佢。 佢嘅服務好細心，係Confirm佢同big day之間嘅時間佢都俾咗好多advice我哋，例如個lighting嘅theme要點揀﹑個backdrop﹑服裝效果之類。另外因為佢之前都影過美麗華，所以都好熟同埋俾到好多意見我哋，令到成件事可以一致啲。 到咗big day當日我哋好早開始，佢哋都好professional好準時，整體成日都好smooth，好多時反而係佢哋隊crew lead住我哋成班人，而最令我屋企人開心嘅係佢哋重做埋大妗姐嘅角色，令到整體氣氛好好。 我自己最深刻嘅地方係段video要拍我同太太講嘅一啲感想，佢有大概俾個框架我話我知要講咩，呢一樣我覺得佢做得幾好。 最後一點意見就係影完唒交相嘅時候communication可以做好啲，佢本身係話四個月內交相，最後佢就好近deadline先交到相，我當然希望係越快越好，不過整體都好滿意，佢好體貼同埋經驗好豐富!

我哋本來都打算影一輯本地一輯海外pre wedding，但就冇諗過會會用番同一個攝影師，影完海外之後覺得Bernard影得非常好，所以就用番佢影本地。我哋同佢好似去咗一次旅行咁，由本身只係認識，最後好似變咗朋友咁，同埋佢啲出品真係非常滿意，另外氣氛亦都好好。如果我哋搵過第二個攝影師可能就冇咁有默契，要重新適應過，但係同Bernard就唔同，佢一話「夾一夾雞蛋」我就即刻明白，其實即係要幻想胳肋底有粒雞蛋咁，要留啲空位，如果唔係手臂會好肥，同佢嘅默契係令到成件事快好多! 當日我同我先生揀咗四個地方，今次我哋反而係我哋自己先行一次四個景點先，我哋去咗消防局﹑snooker房﹑馬鞍山海星灣，其實我哋都係揀一啲我哋好鐘意嘅地方去影，係我哋兩個嘅故事。我哋都有討論過吓，因為我哋心目中有啲pose，好似影snooker嗰度我想用啲波拼0214出嚟（我哋2月14結婚）。 我哋同Bernard已經有默契到唔駛討論時間同景點，只係討論擺咩pose，成件事好快就搞掂。Bernard事先都做咗好多準備，佢問我先生拎咗佢同事之前影消防局嘅sample，我哋又一齊上網睇吓外國人喺消防局係擺咩pose影，另外佢又show俾我哋睇以前同新人喺波樓同埋海灘影過啲咩pose。我哋同佢提議我哋想吹泡泡，佢又提番我哋有啲相可能會遮住咗塊面，俾定心理準備我哋，可能要影好多次，佢有好多想法俾到我哋。 另外個化妝師 Hazel 都好好﹑好快手，我開頭都幾擔心個妝hold 唔 hold 得住，但最後個妝都真係好結實，唔會去到下晝已經甩哂，而Hazel 換妝都好好，好快手。 整體嚟講都好好，因為始終好多景點係佢唔熟，但係佢都可以好快手咁又影得好好，加上我哋有咗默契，就算喺佢面前錫我哋都冇咁尷尬，所以覺得比海外嗰輯影得更加好!