我家姐之前結婚嗰時本來想搵 Monet 既 Charles Cheung 影，但當時佢唔得閒所以派咗Bernard去幫佢，當日覺得佢好好人，氹得我哋姊妹好開心，於是就 like咗 Bernard個Facebook page。一路睇Bernard 個Facebook見到佢啲相影得啲人好開心，個氣氛好warm，而呢個就係我結婚最想要嘅嘢。當時同其他攝影師比較過都係覺得Bernard嘅style最適合我，因為佢掌握現場開心嗰個mood掌握得好好！ 約去佢公司傾既時候都已經好似見朋友咁，話晒之前喺家姐嘅big day都見過佢，知道佢係一個好caring嘅人，佢明白新人好緊張，所以會用好多說話去安撫我哋，將好嘅嘢講得更加好，可能有時啲新娘講嘢唔吉利「死死聲」咁，佢又會提番唔好咁講，又會將唔好嘅嘢講到好，令到你好安心，唔會緊張。 出發之前Bernard俾咗好多點樣準備嘅意見我，首先揀衫嗰幾次我哋都有見面，佢會講吓有啲咩景點會去，佢會描述個景點描述得好詳細，聽完我都已經好期待！我哋有一日去咗Paris影，影Paris可能就係影一啲grand啲嘅嘢，好似羅浮宮咁，佢就提議嗰一日揀嘅衫要配合番個主題，揀啲大拖尾﹑閃令令嘅婚紗。第二日我哋去普羅旺斯影薰衣草，佢就提議嗰日著啲花花﹑夢幻啲嘅衫，嗰度可能污糟啲比較難行，佢就唔建議揀大拖尾。我哋第一次影pre-wedding咩都唔識，又第一次著婚紗，佢提點得我哋好好，好sweet，將我哋唔會注意到話到俾我哋知。佢亦都表現到俾我哋睇佢係好了解法國呢個地方，佢plan好哂要去邊影，唔駛我自己去諗，令到我一D都唔擔心。佢又會幫你match番啲衫去襯番啲場景，唔係任你亂揀影響個效果，好安心！。 好深刻有一張喺羅馬鬥獸場影，我揀咗一條好elegant嘅裙，再經化妝師揀咗個頭飾同造型，成件事由頂帽到手套再加一把好古典嘅遮係好elegant，喺個鬥獸場面前影好靚，真係100% match！超鍾意！Bernard嘅服務完全係tailor-made，佢唔止係一個攝影師，仲擔當埋導遊嘅角色。我問番佢係咪去過好多次，點解會咁熟，原來佢喺帶我哋幾對新人去影之前自己揸車去過哂啲景點，佢自己計哂時，知道幾時日落，真係一分一秒都冇浪費。有一個地方係我自己request，Bernard應該係冇去過嗰個地方，係好似天空之城咁，好似坐這山望那山，而對面係有一個好靚嘅城鎮，佢竟然搵到一個地方係遠離所有遊客，完全做到我想影對面個城鎮嘅要求。我諗佢一定係事先去行過一次睇過啲環境，呢一點係我非常appreciate! 返咗香港都即刻有得揀相，反而係我哋拖佢，我哋揀得慢，佢就係咁催我哋，因為佢要預時間執相，其實佢售後服務真係好好。執完相都完全係我哋想要嘅嘢，藍天白雲咁，仲靚過我哋當日見到嗰個天；另外影薰衣草影到得番我哋兩個，唔知係佢技術好定係後製，當初我哋都冇為意，所以都好surprise。 最後一定要題佢本相簿！！ Bernard可以揀 print 張相落相簿或者人手黐落去，我哋揀咗人手黐，佢都有講過要用多十倍時間，但係佢都真係逐張逐張幫我黐，我真係非常鐘意呢一本handmade嘅相簿！

我哋有行過婚展，見好多都係賣明星，都比較過幾多啲價錢同相，不過因為選擇太多，個個又係攞最靚嗰放出嚟，所以行完晒都係揀唔到。然後呢間係我老婆上佢facebook睇話覺得好似幾好，睇落影出嚟都幾靚，價錢又合理，就決定用佢。初時未去到佢studio前見facebook度有啲佢同明星合照嘅相，應該係啲明星搵佢幫過手，都驚佢係明星效應（即係收你貴啲但其實無料），但後來真係同佢接觸咗之後覺得佢真係有實力，完全物超所值！Bernard佢主要負責big day當日攝影，造型同化妝師就係我哋自己額外喺出面請。 Big day當日我覺得大家有互動係非常之好。我成日都好怕我有我影同擺pose會好唔自然同生硬，好在影嗰日大家都可以傾吓，我又講吓我想點影，佢又俾返啲意見我可能咁影會好啲之類。當日接新娘嗰時，佢上去同新娘影咗相先，再落嚟幫我同啲兄弟影，不過因為我老婆嗰邊啲人太興奮，掛住用手機都係咁影又自拍，差啲過咗吉時都未出門，都幾驚險！但嗰時Bernard佢幫我哋手睇住時間仲同我哋講「唔使擔心，夠鐘嘅話我會即刻捉你哋走架喇！」，真係好細心，感覺都好warm。最後我哋都係緊緊達陣咁喺夠鐘前衝到出酒店門口！之後去到我屋企（男家）嗰邊影相，啲親戚朋友輪住飲茶，佢每一個親戚都講到唔同嘅吉利說話，令到個個都笑得好開心，氣氛好好！我覺得佢真係好勁，佢作嘅對聯真係好搞鬼，句句唔同得嚟仲要全部都好順口！ 我哋婚宴場地就比較新，所以佢都話唔係太熟，但我就唔覺得佢有任何攞景困難之類，都好快捉摸到。成長片段嘅相同歌都係我俾，所以ok無咩特別comment，啲相都好清楚同換相時間都捉得幾好。不過朝拍晚播嘅片就簡直係無得彈，我老婆到宜家都係一睇條片就眼濕濕。初時有draft嗰時，我老婆已經好感動，到條片出到嚟真係不得了。朝拍晚播佢揀隻歌好好，後來我同我老婆都搵返嗰隻歌自己download嚟聽，我身為男人都有啲聽到起雞皮。成個效果我都無諗過咁好，隻歌仲要完全fit到條片，時間都啱啱好。唯一意見就係想提吓佢食少啲煙，咁身體健康先可以接多啲job架嘛！其實過程中就完全無影響到我哋或者見到佢係咁食煙，只係見佢啲袋入面都好幾包。 整體嚟講我都係好滿意，我自己感覺就覺得佢有做多俾我，完全唔會話俾我一個感覺係「唔係喎，佢俾咁多錢我架咋喎」。到big day幾個月之後左右收到相，我無諗過個效果會係咁好，影出嚟嘅相都係好好睇同好自然。我啲屋企人睇完都覺得滿意，我嚟緊有啲朋友準備結婚我都介紹咗佢哋用Bernard。