其實我都去過好幾次婚展，好多大公司例如希臘女神嗰啲大牌子我都睇過，又問過好多朋友意見。嗰時都覺得佢呢啲大公司show出嚟嗰啲相都okay靚既，問題係擔心到自己影嗰日係咪真係會安排到自己鐘意嘅攝影師，諗諗吓就唔係好想搏。諗返轉頭婚展搵婚宴場地係okay既，因為可以一次過睇好多公司，但攝影方面就要有心理準備裡面啲公司好chur，比較難搵到啱，sell嘢既氣氛好重。所以當時我哋覺得White Gallery真係好特別，佢哋會俾我哋坐低慢慢聽佢講佢哋嘅plan，然後鐘意就join，唔join都無所謂，令我哋感覺好好。佢哋個booth只可以accommodate到一對客人，態度好認真，唔會想狂sell，同其他公司好唔同。 我一落訂佢哋就已經俾咗張note card我哋。上面有好多好清晰嘅指示，例如，大約影之前2個月要上去試衫、想多啲造型就留返長啲頭髮、男仔最好剃鬚先、鐘意嘅公仔或者物品都可以帶埋去先，佢哋會安排吓點影等等，都喺張咭度寫晒，好仔細！其實一開始2015年5月我已經book咗，嗰時因為怕熱，諗住12月影，但因為天氣問題，最後差不多1年後先影。White Gallery佢哋好好，會幫我哋留意啲天氣，仲主動打嚟同我哋傾天氣唔係咁好，會唔會想改期影。最後我哋都改咗好多次時間，我覺得佢哋真係好好，直頭send埋天氣報告俾我哋睇。原本我哋都怕時間會唔會太遲先影，但佢哋就同我哋講唔使擔心，會影得切，再建議我哋睇天氣大約邊日影會好啲，結果都要去到5月先影。 攝影當日一開始喺佢哋九龍灣studio集合影室內景先。我記得嗰朝個天有啲灰，所以上到studio嗰時其實心情唔係咁好，都擔心啲天氣，但攝影師好快令我哋投入到成個過程。KK會教我哋做咩pose，又會好輕鬆咁開解我哋，例如我同佢講話「我真係唔識點影。。。」，佢就會話「傻啦，個個都唔識點影嘅。唔使擔心！我會令你知道可以點影架喇！」。有佢呢句真係令我好放心，同埋真係令我哋兩個可以好快投入到狀態。Studio影室內相warm up完之後我哋就上咗山頂。好感恩，上到山頂就見到個天好開始清，最後仲全日都無落雨！～上到山頂，佢哋知道晒有邊啲地方啱影，就算同一時間有2至3對新人都喺山頂度影緊相，佢哋都會知道可以去邊度避開先又影到靚相。影完山頂後，我哋仲去咗西貢東壩影到7點幾，再去西港城，最後仲返studio影晚景！嗰日結果由朝早8點影到11點幾，但佢哋仲係好熱衷咁幫我哋完成呢輯相，真係好厲害！其實我哋中間都唔記得食嘢，喺佢哋主動問我哋要唔要食佢哋之前預先買定啲包，同我哋講唔緊要，隨便食。佢哋會真係令到我哋好投入到全個過程，所以中間真係連無食飯都忘記咗，唔知肚餓。 之後我哋就再約時間上去睇相，有個專門處理睇相嘅同事幫我哋。佢會首先攞晒啲相出嚟，然後攞其中幾張示範吓執咗同未執個分別會係點，俾個大約嘅槪念你先，然後再逐張相咁show同教我哋點睇。有時啲相會幾張差不多位置嘅都好鐘意，佢就會建議我哋幾張相拼埋一齊睇。然後又見我哋某幾張相個感覺比較似，就會提醒吓，問我哋會唔會想揀其他唔同嘅。當然佢都會問吓我哋想唔想揀多啲相，但佢唔會hard sell，成個過程都令我哋感覺好舒服，完全係等我哋自己揀。 輯相我啲朋友睇完話覺得唔似平時嘅我，因為我平時覺得露齒笑唔靚，但攝影師佢就鼓勵我去影。最後出到嚟都覺得幾靚，連我自己都無諗過原來露齒笑影出嚟都幾好睇，而且好自然，簡直係對自己嘅新發現。我覺得佢影出嚟啲相感覺好自然，睇住會覺得好舒服。即使我哋唔係想要大教堂好grand嘅感覺，但就算係一幅牆，佢都影到一種好特別嘅感覺出嚟。

自己真係好幸運，幫我搞婚禮嘅每個人都好好，KK雖然係貴咗啲，但真係影到我想要嘅感覺。我係去婚展搵到佢，佢唔會好似其他嗰啲攝影公司不斷拉住我，反而我係見到佢啲相，被相片既攝影手法吸引我去了解佢。當時睇咗幾本sample，見相裡面啲人都唔需要好刻意擺pose都已經好靚，感覺係好自然。 影既時候係刻意响studio影咗一部份先，因為KK想我哋先攞咗個感覺，習慣咗對鏡頭先出去影外景。成個過程都好舒服，我同我先生唔係嗰啲想影浪浪漫漫坐馬車嗰種人，我哋反而想影地盤，例如一啲荒廢咗嘅學校就啱喇～ 我哋發現原來地盤都幾難入，一定要識人先入到，我先生有個朋友喺地盤附近做，佢就建議我哋星期六﹑日去影。我哋係五月影，嗰陣都時不時會落雨，咁有一日好天啲我哋就諗住約KK去影，點知佢就約咗人，佢就解釋番成件事話如果太陽唔充足影出嚟效果都唔會好，反而佢咁樣解釋我哋就明白。有一日我哋上山頂影其實都有啲霧，但影出嚟既效果都幾特別，感覺好好！講返地盤，我哋本來都真係諗住入去地盤裡面影，但係中途就俾人截住咗，KK知道我哋真係好想影就提議我哋不如試吓喺外圍鐵絲網影吓，後來仲爬埋上去架鏟泥車上面影！記得當時都真係好驚險，好彩俾人叫我哋走之前都影到晒！ 揀相既時候，因為我哋package都包咗60張相，覺得都夠，當時心諗出面嗰啲唔買相會黑面，但係KK佢地都真係完全唔會，仲送多兩隻有我哋個樣嘅光碟俾我哋。KK服務真係好好，所有嘢都親力親為，所以如果以後可以請個人幫吓佢就好了。