自己真係好幸運，幫我搞婚禮嘅每個人都好好，KK雖然係貴咗啲，但真係影到我想要嘅感覺。我係去婚展搵到佢，佢唔會好似其他嗰啲攝影公司不斷拉住我，反而我係見到佢啲相，被相片既攝影手法吸引我去了解佢。當時睇咗幾本sample，見相裡面啲人都唔需要好刻意擺pose都已經好靚，感覺係好自然。 影既時候係刻意响studio影咗一部份先，因為KK想我哋先攞咗個感覺，習慣咗對鏡頭先出去影外景。成個過程都好舒服，我同我先生唔係嗰啲想影浪浪漫漫坐馬車嗰種人，我哋反而想影地盤，例如一啲荒廢咗嘅學校就啱喇～ 我哋發現原來地盤都幾難入，一定要識人先入到，我先生有個朋友喺地盤附近做，佢就建議我哋星期六﹑日去影。我哋係五月影，嗰陣都時不時會落雨，咁有一日好天啲我哋就諗住約KK去影，點知佢就約咗人，佢就解釋番成件事話如果太陽唔充足影出嚟效果都唔會好，反而佢咁樣解釋我哋就明白。有一日我哋上山頂影其實都有啲霧，但影出嚟既效果都幾特別，感覺好好！講返地盤，我哋本來都真係諗住入去地盤裡面影，但係中途就俾人截住咗，KK知道我哋真係好想影就提議我哋不如試吓喺外圍鐵絲網影吓，後來仲爬埋上去架鏟泥車上面影！記得當時都真係好驚險，好彩俾人叫我哋走之前都影到晒！ 揀相既時候，因為我哋package都包咗60張相，覺得都夠，當時心諗出面嗰啲唔買相會黑面，但係KK佢地都真係完全唔會，仲送多兩隻有我哋個樣嘅光碟俾我哋。KK服務真係好好，所有嘢都親力親為，所以如果以後可以請個人幫吓佢就好了。