我哋一開始睇咗佢哋嘅sample，佢哋拍攝手法係比較溫馨啲陽光啲嘅類型，好fit我哋本身想追求嘅野，所以就揀咗佢哋。Big day之前佢冇特別要求我哋著咩服飾，不過佢有提及最緊要係我哋鍾意，亦都有話有咩大概嘅服飾同style可以send定去俾佢哋參考下。 Big day當日佢哋成隊crew有Team dress code，大家一齊著住牛仔褸，我自己覺得好特別，唔知佢哋係咁啱夾咗定係真係特登著，不過真係幾得意。我本身都覺得攝影師著casual wear比較好，因為有時有啲好pro嘅全身in black咁，其實有少少得人驚，佢哋就令人好舒服，好似朋友入咗嚟咁。 當日佢哋有四個人，我覺得佢哋分工分得好好，有啲就專負責搞氣氛，譬如斟茶位好悶，都令到爸爸媽媽笑得好開心，有啲就默默喺背後拎啲靚angle影。當日無論係氣氛啦，片定係相嘅效果其實我都覺得好滿意。佢地係拍片，不過攝影師同佢哋係partnership嘅形式所以一併同佢地公司聯絡，因為係老公負責所以詳細唔係太清楚。 早拍晚播片都好睇，我覺得幾感動，特別係誓詞嗰part。條片分咗兩大部份，第一部份係朝早，用輕鬆啲嘅手法去拍出門啲野，到後段佢就轉咗個mood，係講父母嘅叮囑同宣誓時啲感動位，我覺得佢哋影得好好。 佢哋好caring，一朝早個schedule有啲overrun，我都有D緊張，佢哋都會埋嚟同我講唔緊要，建議我點做就唔洗擔心schedule會向後推，教返我點做，個人當堂定返晒。中午我哋有個外影，本身定咗特登搭車去中山紀念公園喺西環嗰邊，但係當日天氣好熱，佢哋又會建議話其實過到去啲兄弟姊妹都會好辛苦。而其實屋企附近都有個大大哋嘅公園，相對多樹木，佢哋就建議不如試下喺樓下拍，等大家都可以舒服啲唔洗曬得咁辛苦，因為如果中午用哂所有體力夜晚就會好辛苦。我覺得呢個建議好好，同埋就算我哋喺嗰個公園拍，都出到我哋想要嘅效果，所以我覺得佢哋都好好，好識照顧我哋嘅感受。 雖然拎相比起promise嘅3個月遲咗一個星期左右，不過我知道唔係佢哋問題，係佢哋partner影相嗰邊唔知係咪有阻滯。而拎相時令我好impress，因為有啲攝影公司要啲新人事先俾定hard disk佢哋拎相，但係呢間就唔洗我哋咁做，直接俾咗隻好精美嘅木紋USB我哋，又有盒，絲帶同乾花，同埋仲好有心機咁揀咗五張佢哋覺得最精彩嘅相，細細張附埋喺個盒度，我覺得真係好有心思。

我係喺網上搵到呢間專拍video嘅公司，好surprise我哋一留message佢哋即時覆，而我哋亦即時約埋時間出嚟見面。我哋之前都有睇過其他一條龍嘅攝影師，但係睇過demo同早拍晚播都覺得完全唔okay﹑配合唔到。 當時第一次見面，Kris同Henry一齊出嚟，首先佢哋present一啲demo，然後仔細咁問我究竟我哋想要啲咩手法。傾完之後，我覺得我哋一拍即合，於是即時就cofirm咗。 Big day當日，我哋係喺數碼港艾美酒店擺酒。當日都係Kris同Henry兩個人嚟，佢哋衣著都好得體﹑又好有禮貌。當時我都好擔心唔知佢哋同攝影師唔夾，因為佢哋都未夾過，所以事前我哋安排咗攝影師Henry同Kris見吓面。可能佢哋已經溝通好，所以當日好okay，走位嗰啲完全冇問題。Henry佢都好細心，好識照顧我，一路喺個流程上都有guide全我。因為九月都比較熱，有啲地方要出去影一啲shot見我流晒汗，佢都好主動去遞紙巾俾我，真係好細心。當日係晏晝，所以變咗唔係same day edit，但係都有幾分鐘叫做係精華片後咁，個full video係之後先俾我，咁佢俾啲shot我都係幾快，佢promise嘅期都真係俾到我。 睇完早拍晚播，啲賓客comment都幾好，佢係將當日嘅嘢剪成一條片俾我，因為當時係冇「落場」呢個時間俾佢做edit，所以之後先俾到我。睇完之後我好開心，睇咗好多次。揀歌方面，我好信阿Kris，佢揀嘅歌我都okay，係英文歌，有啲似成長片段用嗰隻歌。我都有問過佢有啲咩recommendations，佢又俾咗啲呢一類類似咁嘅style嘅background music。 Big day完都係一出就出final架喇，佢剪輯嘅效果係好好嘅，比出面拍片嘅都好好多。出面嗰啲就好似用一個template咁樣，1秒就塞呢樣嘢落去，11-12秒就塞呢樣嘢落去，但係HW Motion做出嚟效果就唔係咁嘅，尤其係佢哋唔係same day edit剪出嚟效果係唔同嘅，佢哋elements都同嘅但係就放喺唔同嘅位置。 我哋係有兩段片，第二段其實有少少問題不過佢哋都好快fix番，可能佢render上面有少少technical問題出現咗，條片都好長啦可能都唔會望一次先，但係我哋緊係會望一次先啦，佢哋都即時執番俾我嘅。我好滿意佢present俾我嘅方法，佢係將條片放喺USB入面，有個盒裝住隻USB，個盒係包裝得好精美，亦都印咗我同我先生個名落去，同埋晒咗一啲佢覺得係唔錯嘅shot俾我，係放銀包嘅size，呢個都係一個surprise，我原本都唔知會有咁精美嘅包裝，所以真係好開心! 不過佢哋都喺婚攝界未係好出名，佢哋product好好，希望可以再俾多啲人reach到佢哋啦！之後，我都add咗佢哋做Facebook friend，喺FB Page見佢哋買咗好多唔同器材不斷增值，我係好欣賞佢哋呢樣嘢，有靚equipment加上角度拍得好咁就有好嘅product啦!