我幾年前搵Adele Bridal影過婚紗相，幾年後想搵人幫手影家庭相，再幫爸爸媽媽影多輯婚紗相嘅時候，就諗返起Rae同Frances佢哋兩個嘅舖頭，因為影婚紗相嘅時候我已經對佢哋算係一見鍾情！我覺得佢哋好真誠唔會呃人，亦都唔會好hard sell或者不斷慫恿我消費，成個過程都係非常之好。 加上我好鍾意Rae嘅攝影風格，所以我之後都毫不猶豫咁搵返佢哋幫手。Rae嘅風格好多變，活潑或者靜態嘅都得，我對佢嘅攝影技巧非常之信任，所以成個過程都唔會話過問好多。

至於佢哋嘅Studio就好有品味同高級感。兩層嘅studio入邊有六個場景，每一個風格都好特別，可以迎合到唔同嘅需要。 我爸爸媽媽影婚紗相嘅時候，禮服婚紗都係喺佢哋舖頭選擇。佢哋會了解我媽媽嘅需要再進行篩選，會諗吓有啲咩適合我媽咪。最後佢哋幫我媽咪揀嗰件真係非常之合適，試嘅時候已經覺得好靚好驚艷，絕對唔會係求其hea你。可能因為佢哋都幫過好多唔同嘅新人試衫，所以眼光都非常準，一睇就知我媽咪係適合啲乜嘢類型嘅衫。佢哋婚紗嘅款式唔會話好複雜，但都好靚，睇得出佢哋係專登為咗襯studio而比咗好多心機做選擇，feel到佢哋對美感有好大嘅堅持。

老人家其實都唔係好識擺pose，影相嘅時候都係靠Rae由頭帶到落尾。佢好有熱誠好用心機咁樣指導，令到我好放心。爸爸媽媽影完之後都不斷讚，無論係攝影、化妝、婚紗禮服都好都係讚不絕口。睇完相嘅時候更加覺得非常之感動，攝影師真係好識得去捕捉我爸爸媽媽嘅神緒。佢哋宜家仲不斷話要介紹俾唔同嘅朋友添！

我其實已經唔係第一次搵Adele Bridal Studio嘅Rae幫我影相㗎喇，我嘅家庭相不論係有老人家定係有小朋友，都係搵佢哋嘅，睇我post嘅相就包括咗唔同階段去影嘅結婚相、2019年第一次懷孕嗰時影嘅同今年第二次懷孕嘅相。因為佢哋嘅服務真係令到我非常滿意，如果唔係都唔會做回頭客啦！😂

我覺得佢哋犀利嘅地方係可以因應客人嘅需要調整風格，例如我自己就鍾意自然少少，唔係特別鍾意啲色彩斑斕/vibrant嘅相，都係鍾意natural light多少少。有一次我請攝影師幫我媽媽同幾個Auntie影相，老人家就會比較鍾意以前影樓嘅風格，希望顏色可以濃烈啲。攝影師都可以拿捏得好好，所以我對佢哋嘅專業係非常之有信心。

佢哋嘅專業當然唔單止呈現喺影相風格當中，係連一啲細節位都處理得好好。例如係佢幫我引小朋友注意，小朋友通常都唔合作，未必會坐定定俾你影，仲會走來走去添。但Rae佢都唔會話夾硬迫小朋友坐低，反而係會幫佢哋熱咗身先，例如比佢哋喺studio度跑來跑去啊，用啲零食氹吓佢哋。studio有啲公仔，都可以用來做吸引小朋友嘅工具。當見到小朋友有一啲好特別嘅moment，佢就會即刻影低佢哋最自然嘅反應，可以反映到佢哋對住小朋友真係好有耐性，分分鐘仲有耐性過我對住自己小朋友。😉

咁影老人家嗰次呢，因為我媽咪佢哋都上咗年紀，我唔想佢哋老人家走來走去，於是乎就請Rae去我哋屋企幫手影，佢好到會帶埋個backdrop上嚟，仲專登事前問定我媽咪佢哋當日想着啲咩旗袍，然之後去襯返個style。雖然唔係我平時鍾意嘅自然風格，但係影老人家嘅嗰種時代感，反而係好有驚喜喎。😳 有陣時老人家影相會比較僵硬，唔係好習慣對鏡頭，Rae都會不斷同佢哋講嘢，又係會幫佢哋熱下身。我覺做多咗呢個步驟個效果已經差好遠！由幫小朋友同老人家影依兩個事件，可以知道Rae真係好有耐性、好專業。😄

佢哋嘅studio好多景，有一個食飯枱係專門for family portrait、有大啤啤、花花、仲有火爐係for christmas，所以每一次影都會有好特別嘅體驗，係好開心嘅。😃另外我都好多謝佢哋肯彈性處理我哋影相超咗少少時間，因為有陣時BB突然要食奶，都會耽誤咗少少時間，佢哋都唔會同我去計較。不過我做客當然都識做啦，唔會專登去攞人着數嘅！只不過係想反映番佢哋係好貼心咁為客人去着想，真係一間服務超班嘅公司～😭