其實當時我都有睇過其他大妗姐，但嗰陣時佢哋啲檔期都好full，我又有睇過關於Ling姐嘅評價，而佢又有檔期，就決定揀佢。喺溝通方面，Ling姐俾我嘅感覺係好健談、平易近人，解釋問題亦好清楚。無論我問咩問題，佢都好有耐性咁解釋👍。Big Day之前，我哋仲見咗幾次面，Ling姐都有幫我哋整理當日嘅流程。

Ling姐嘅表現真係幾好，佢會準備好曬所有需要用嘅嘢，包括茶杯同其他用具，完全唔洗我哋另外搵姊妹幫手，呢點真係好好。佢可以一個人搞掂曬所有嘢，證明Ling姐喺呢一方面真係專業又熟手😙。不過，有個地方我覺得Ling姐可以改善，當日時間其實比較緊湊，但出門嗰陣，Ling姐有唱埋出門歌。我覺得呢個環節可以考慮跳過，可以淨係做最重點嗰樣。如果可以喺呢到慳返啲時間，去到男家嗰陣可能就唔會超時。

後尾Ling姐喺男家發現overrun之後，都有幫我哋追返啲時間，而且俾咗啲建議我哋，例如係簡化敬茶嘅步驟。但如果可以早啲問邊啲係我哋覺得一定要做嘅環節，同可以簡化嘅地方， 喺時間掌握嗰到就會做得更加好！ 

我係透過朋友介紹認識到Ling姐😆。Ling姐俾我嘅印象係專業，而且仲好細心同有經驗。佢亦都係一個幽默嘅大妗姐😚。準備Big Day嘅時候，我好多問題都會問佢，佢都耐心解答，都有試過約出嚟去講返一啲注意事項同埋當日嘅流程👍。佢都俾咗唔少建議， 又會特別提醒我哋一啲唔太熟悉嘅習俗。我事前都有提過有邊啲親戚會嚟出入門，Ling姐都記得呢啲我之前同佢講過嘅一啲細節，仲幫我mark低咗，所以當日都好順利！

Big Day當日，Ling姐幫我哋做出入門嘅時候，大家都話佢好識搞氣氛，令到氣氛唔會太緊張，可以輕鬆一啲✨。即使有啲長輩唔太識得處理啲情況，佢都好自然咁lead住大家，令大家都會輕鬆啲。出入門嗰陣，我原本都有啲擔心時間會太倉促，但係Ling姐好有經驗，真係幫到我哋追返啲時間😝。

當日我都有請Ling姐留低食餐飯，雖然過咗working hours，但係Ling姐依然幫我戴好啲金器。因為可能我啲金器太多，戴得唔係咁好，Ling姐即刻主動幫我用紅繩整理好，所以只要有地方需要佢嘅話，Ling姐都會主動幫手💯。整體我都滿意，有啲姊妹下年結婚都話想用Ling姐，不過可惜已經遲咗book佢🥹。