我老公之前做朋友結婚時嘅兄弟個陣識咗Ling姐，都覺得佢ok，同埋朋友都覺得好，所以到我結婚👰🏻就搵咗Ling姐幫手。

我地中間溝通都係用whatsapp，初頭就用中文，後尾發現佢英文都可以，就更加好喇，同埋都覆得快。如果佢早少少可以提我地有咩要預備就更加好，可能成個list 咁。佢上頭前一兩日提我地要預備碌柚葉，我地本身又唔識，變咗就有D趕。同埋我地過大禮本身都諗住搵佢幫手，但因為佢當日有big day job，所以就搵咗佢出嚟飲茶，問下應該點樣做好。咁佢都好好，免費搵咗兩個佢嘅幫手嗰日嚟幫我地，我地淨係俾返個利是佢地就得。同埋佢真係好熟D禮儀，又好醒目，一聽到我講「弊喇」就會叫我要講第二個phrase，吉利D。同埋我地上頭同安床都係搵Ling姐，D長輩個個都好滿意，佢反應亦都好好。佢其實都好搞笑，佢第一次見就問我地係點樣識，又問邊個係我地個媒人，咁我地都好認真咁諗，都有嘅......但係佢就話錯，係月老🌙！咁嗰下我地都覺得佢係幾好笑咁😂。

選擇要有大妗姐係因為覺得大妗姐有啲咩突發事件都可以解決得到，始終結婚係第一次，而自己無乜經驗，覺得佢哋有充足既經驗可以面對唔同既問題。而Ling姐佢談話得體，好用心亦都好細心，包括未confirm之前已經比好多專業既意見，令到準備婚禮時候更加有信心。其實我都有睇過幾間，但最後都係選擇咗Ling姐，因為佢比較細心同專業！

佢係Big day之前有好多野提示咗我地，例如Ling姐話今時好多酒店已經唔可以點蠟燭上頭架啦，提我哋準備啲隆重既燈去代替蠟燭，仲話如果有需要可以話比我地知係邊到有得買～ 最深刻既係，上頭之前先發現自己男家個柏葉爛咗！個陣夜晚7點幾，自己當時就好驚啦！就即刻打比Ling姐問係咪隨便係街市都有得買架啦？佢話唔係，仲同我講叫我唔好驚，佢會即刻去買同送埋入黎比我當晚上頭，佢個日由港島區飛出去旺角買再拎入黎沙田比我！呢個位就覺得佢好專業，因為佢知道個流程同埋邊到可以買到，即刻幫我處理，覺得好窩心。

仲有！！Ling姐係我唔知情既情況下透過我同佢講既一啲有關未婚妻既感受作咗一首打油詩！唱出黎個陣令到成個氣氛都好好，全場都拍手叫好！由於個婚宴擺左60圍，場面真係都幾多人，係咁多人既情況下Ling姐都幫我好好安排每一樣野。例如影相呢方面，每人影幾耐，幾多人一齊影等等，令到整個影相流程好好，咁我哋就唔洗成日跪下又企下咁樣。 我覺得有大妗姐同無大妗姐其實真係好大分別㗎！有大妗姐會更加安心，因為佢會知道點樣去應對唔同既情況亦都同時會更加開心，因為大妗姐的確好懂得搞氣氛，無咗佢既話會miss咗啲開心位！

而Ling姐真係一個好完美既大妗姐！！我比滿分！