我當初係經朋友介紹認識到DW ，因為朋友之前用過佢哋嘅影相服務，覺得唔錯，所以推薦咗俾我🤩。之後我都有比較過其他公司，但最終都係揀咗DW ， 因為佢哋嘅影相風格好獨特，唔似其他嘅公司，DW 有佢哋自己嘅風格。而同DW 溝通方面，整體都唔錯，不過我覺得DW 回覆message就比較慢，但係服務態度係冇問題嘅。

我揀咗DW 嘅 Pre-wedding Package，事前攝影師都有同我哋溝通過我哋嘅喜好同要求。攝影團隊都好專業，喺拍攝期間都有指導我哋點擺pose，俾方向我哋去達到想要嘅效果，但係就冇出面嗰啲攝影師會引我哋笑咁樣，都係偏正經。我哋去咗土耳其影相，DW 會帶我哋去好多比較少人嘅景點，影相效果真係好靚，特別係啲景點好少遊客會去，好特別，睇得出好有心機😆。當攝影師搵到好嘅光線嘅時候，團隊會即刻叫我哋擺好pose！最值得讚嘅係DW 好體貼，原本只預咗 1 日影相，但由於擔心當日熱氣球冇升空，而我哋又好想影，DW 好好咁幫我哋spare咗多 1 日，確保我哋可以影到想要嘅相，最後我有着住便服，老爺車同熱氣球嘅相，同着婚紗，兩隻馬同熱氣球嘅相，兩輯唔同風格嘅相💕。喺咁凍嘅天氣下(嗰陣淨係得2度)，一直追住個熱氣球跑，DW 同我哋都堅持影完所有相🥹，所以如果DW 之後都想俾新人揀土耳其嘅話，其實六月就去會好啲，我哋五月去就會太凍，好容易令到新人病。攝影師非常專業，雖然拍攝過程辛苦，但最終成品嘅效果我哋非常滿意❤️！特別係熱氣球同馬嘅相，呢個風格同其他公司好唔同，我哋兩個人都好鍾意呢個童話風格🥰。雖然拍攝嗰兩日真係好攰，但見到相片效果，覺得所有付出都好值得！

當時我其實都有睇過其他公 司，但係佢哋嘅風格唔係我中意嘅，所以都係想揀DW 。當時其實我未確定 Big Day 嘅日期，單純只係想了解下價錢，但DW 都回覆得好快，而且講解得非常清晰，完全唔會令人覺得有模糊嘅地方👍。

我揀咗佢DW 嘅 Pre Wedding，Big Day 2P、2V，加上1A嘅package， 都對佢哋好有信心， 而且兩次拍攝嘅攝影師都係一樣，唔使再額外再夾❤️。喺溝通嘅過程當中，DW 好專業，會主動問我哋有冇啲特別嘅要求，喺rundown同衫方面，亦都有問吓佢哋意見。 本身我出門嘅時間比較緊湊， 新郎嗰邊未必影到咁多相， 但最後DW 可以幫我跟到個schedule之外，新郎嗰到亦都影到相， 睇得出佢哋好有經驗，識得變通💯！拍攝當日，DW 嘅團隊合作得非常好，每個同事都好專業，唔單止攝影，連拍片嘅部分都做得一絲不苟， 氣氛亦都控制得好好。最深刻嘅係DW 會尊重我嘅意願，我之前講過唔想影啲催淚場面， 因為唔想個妝花曬，佢哋完全尊重我嘅選擇，反而幫我同屋企人留多啲時間影相，相處耐啲，呢啲細節真係令我覺得佢哋好有心思🌟。 而且事前有提及過想影嘅相， 全部都有做到😚。 我之前去過其他婚宴， 見到有啲攝影師影得好隨便，但係當晚就算唔係主要嗰兩位攝影師影相， 每一位同事都係好認真咁樣去執每一張相，去影每一張相，所以DW 成個團隊都係好專業🥳。 屋企人同朋友都大讚早拍晚播同埋啲相好靚！ 因為之前Pre Wedding我哋已經有拍過片， 所以早拍晚播真係一啲都唔擔心，出嚟嘅成品真係剪輯得好好，好靚❣️！

拍攝完成後，收到嘅相片同影片真係令我非常滿意。DW 交貨好快，精華嘅相隔日就收到，所有相同片喺三個月內交齊。仲有一樣好窩心嘅係，DW 會將相同片放喺靚靚嘅 USB入面，而且包裝得非常有心思，令我感覺到DW 對我哋嘅 Big Day非常重視。 喺整個過程中，我覺得DW 嘅服務同細節處理得非常好，團隊每一位都好專業，我真係好推薦佢哋，希望DW 越嚟越多人識！