Terence係朋友介紹俾我，聽講佢好好交帶同埋影相都唔錯，雖然本身有去婚展睇下其他公司，但從朋友間收到嘅評語都唔太好，於是都係揀左Terence。 Terence有提供standard package，其實佢個價都講得好實，加上個package已經包哂我地想要嘅野，所以雖然嘗試過傾價錢，但最終價錢冇走盞我地都冇乜所謂。 本身我地淨係prep左啲大路嘅地方，例如迪欣湖、西九、中環等等，但Terence前一晚同我講，話佢有架車可以入到大嶼山（唔係所有車都可以隨便入大嶼山所有地方，某啲地方要licence）、問我地去唔去啲少人影嘅地方影相，例如大澳漁邨、石壁水塘嘅山坡等，又話到時去到唔鐘意都可以去返迪欣湖。因為之前傾野果陣覺得佢幾唔錯，所以諗佢揀嘅野都唔會太差，就決定跟佢嘅建議。 最後影出黎個效果都幾特別，因為始終唔太多人去影，所以bigday特別拎左大澳影果張相放係最大嘅位置。而且我諗個司機係大嶼山嘅居民，好熟個地形，會帶我地去特別啲嘅地方。影完大嶼山已經好熱，加上果日有時會落大雨，所以都要成日入車避雨，但最後仲去埋西九同中環影相，直到十一點都仲係中環。Terence team人好高要求，要我地係棵樹係咁影，無論我地幾攰佢地都仲好有精神。我地問司機哥哥係咪成日都要拍到咁夜，佢話都跟terence係咁架喇，所以都慣左。 化妝師係Hazel，我地係回程途中經過大嶼山嘅沙灘，係更衣室補妝、換衫同換造型，佢做野好快手，化得都好自然，所以我係bigday有搵返佢做化妝。 揀相方面冇催過佢，因為我搵左佢做bigday，所以佢好清楚我地嘅deadline。佢up左批相去server叫我睇住先，唔洗好耐已經有第二批相可以睇。之後揀左啲相叫佢排版，雖然有咩問題佢都好快改好，但我發現有啲我揀左嘅相冇落到排版。佢話因為覺得果啲未算最靚，所以冇擺入去，好彩最尾個效果都ok，所以我就冇所謂。我認為係佢嘅經驗話佢聽唔好擺太多相，而佢叫我揀果50張相係預左俾個客揀多啲，而佢要再執下個數量同排位，可能關乎美感問題。