我搵化妝搵咗好耐，上網睇咗好多都唔啱，因為我唔鐘意好浮誇嘅妝，所以好難搵到啱心水嘅化妝師。咁啱去朋友婚宴見到新娘嘅妝幾靚，係清清哋嘅淡妝，所以就決定搵佢嘅化妝師Joey。 之後去咗搵Joey幫我試妝，試咗三個妝，包括早妝晚妝同埋證婚嘅妝，又有髮型師Shermine幫我set埋頭，試完之後好滿意，所以都決定咗用佢哋，亦免埋試妝費。之後睇返當日試妝啲相，覺得上鏡嘅話個妝好似太濃，於是就同佢講返呢個問題。佢同我解釋返化濃少少係台上面會好睇啲，而且影相望落係會比實際濃，雖然佢係咁講，但bigday嗰日都有聽我意見化返淡啲。而且結婚之前仲可以試多一次妝，唔洗錢，十分貼心！呢個價錢係包括全日，再加埋雙方母親嘅妝容，姊妹方面係另一個化妝師負責，大概300蚊一個人。 佢份人好要求完美，人又細心，亦好專業，將我唔太好嘅皮膚修飾得好好。而且，佢會因應我皮膚嘅狀況去決定補妝定重新化妝，臨完場嗰陣佢見我皮膚有啲乾，所以就幫我落妝再化，呢點睇得出佢好力求完美，想所有嘢都做到最好。不過佢就一定要我戴假眼睫毛，但我其實唔鐘意，同埋覺得比較浮誇，但佢就好堅持，話如果唔戴嘅話影相對眼會唔夠神，最後都有聽佢講戴咗。