本身唔prefer係旺角，諗住揀尖沙咀。我機緣巧合睇到帝京張leaflet，雖然上網發現comment唔多，但大部分都係好嘅。而上網搵到啱我要求嘅得呢間同尖沙咀Hyatt，當時其實都好掙扎，因為Hyatt表面嘅嘢好靚，但個場有啲細，而且hyatt個sales太hardsell，所以就冇揀。我哋揀咗係帝京軒擺，但結婚嘅話就會變喜酌堂（後尾改咗名做喜宴堂），擺咗廿二圍。 帝京兩個sales都好好，一個叫Aki，令人感覺好舒服，另一個叫Stephanie，唔hardsell好似朋友咁，response好快，亦會盡量解答疑問。我哋要求table list用我哋啲紙print，佢哋仲會幫我諗埋用咩色襯，又一早係新娘房prepare咗燙斗，好貼心！另外，因為佢哋個stage好高，而且我有老人家要上台，佢哋就特登幫我安排咗ramp令輪椅可以上台，所以各樣嘢都令我好窩心。 嘢食方面亦令我好滿意。其實我之前去過呢到食中菜亦好好味，所以我相信擺酒都會咁好味，而結果都真係一樣。平時婚宴嘅鮑魚大概湯匙咁大隻，但我upgrade咗個菜單係六頭鮑，所以我特登叫我伴娘提我記得食鮑魚！！我諗新娘嚟講我都食得幾多嘢，我亦覺得幾好味，無論餐前小食到晚宴都唔錯，賓客嘅feedback通常都係呢兩樣：個場好靚，啲嘢好好食，特別係魚，仲有最尾上嘅水餃。我揀呢度嘅原因，係唔想賓客俾錢食啲唔好味嘅嘢，想佢哋嚟得開心。 我嗰晚stay係酒店，夜晚攞上房嘅，唔係當晚嘅餸俾我，而係重新煮多兩份俾我哋食！因為我婚宴有食到，而且Stephanie一早講咗唔係「打包」，係重新整，所以覺得好好，而且嘢食真係好好味！另外，佢俾我間房亦好靚，大到不得了，上網睇返原價要六千幾蚊晚！各樣嘢都好好。