去婚展其實都真係搵唔到啲啱自己既，覺得好多都差唔多，特別係有啲公司基本上妳俾佢哋捉住就一定走唔甩！後來朋友介紹認識咗阿Don，而同阿Don傾既感覺同好多攝影師都好唔同，佢真係一個攝影師，似藝術家多過一個生意人，好似我哋join唔join都無咩所謂，同一啲係咁sell，方死妳唔落單既公司差好遠！ 當時我哋confirm既時候阿Don嗰admin同事好似啱啱無做。佢嗰時真係好忙，問佢啲嘢都要遲一排先覆到我哋。都明白有員工走咗而自己要做埋admin嗰份會好吃力，有時會有啲minor嘢搞錯好似串錯字咁都會發生，但係我哋都明而我哋都唔會介意，只不過希望佢唔好咁辛苦啦。 結婚當日真係好亂，有時真係乜都諗唔到，而我好深刻記得既就係當時回門返去男家屋企，一入門口就好多人好嘈，又話要影相，有話要點，場面真係好亂！過咗一陣阿Don就係突然係我耳邊扮係影緊我咁，然後細細聲講“喂，叫人呀，記得叫人呀！”，嗰刻真係醒一醒即刻嗌“老爺奶奶，老爺奶奶好！” ，其實唔單止係呢樣，真係好多嘢都係佢提我，所以我全日都好rely on 佢，有乜嘢都係望吓阿Don點睇先。 另外就係我哋全部人都好大頭蝦，影影吓阿Don既助手就話點解個花球好似未見過既？當時大家先發覺原來個花球一路都無出過場！到最後佢哋都肯同我哋補影番幾張，到最後大合照都有攞番出嚟影，又係多謝佢地提醒！ 阿Don啲片真係靚，當時播早拍晚播既時候阿Don都係個台附近做嘢，當時我睇到條片真係好靚好感動，都不期然俾個 thumbs-up 佢，因為真係好好，原來佢全日以嚟都不期然咁補足咗好多moment，到後來可以係片段裡面見到真係好開心。而相都唔錯不過有啲shot會影到天花板同埋啲exit sign, 其實都唔知阿Don佢地可以點避開呢啲嘢，當然如果呢啲嘢唔入鏡就會更好喇。