我同我老公結婚就比較特別，簽紙同擺酒係唔同日子進行，所以簽紙嗰時就請咗部分時間嘅攝影師，大約喺兩三個鐘左右，然後Big Day嗰日就再請一次攝影師。其實我哋計埋prewedding同簽紙都係搵Gallery C幫我哋影，我哋又覺得佢哋影得好，所以後來影Big Day當然係諗都唔駛諗就搵返佢幫手，始終影得好又熟咗。(簽紙喺搵咗Jan，prewedding就搵咗Billy，big day都係Jan，因為Billy喺我老公兄弟團嘅一員黎~) 雖然之前已經簽咗紙，但其實其他嘢我哋婚宴嗰日都做返足，例如接新娘、斟茶嗰啲。嗰朝好早8點鐘左右我老公佢哋就要到我哋新娘呢邊(沙田麗豪酒店)，攝影師佢哋一行四人仲比約定時間早到咗！佢哋黎到之前仲打電話黎問吓我哋ready未，真係好貼心。佢哋黎到就教我哋同啲長輩應該點樣攞住啲金器同茶具影相，不過因為我哋有請大妗姐，所以整個流程隊crew就主要專注喺影相嗰邊。 雖然佢哋主要幫手影相，但佢哋同我哋啲親戚長輩都相處得好好，仲同部分親戚做咗朋友，好好傾！然後我哋就再由女家過男家嗰一邊(馬鞍山)。除咗斟茶呢啲重要環節，佢哋仲有同我哋喺屋企樓下同屋企裡面再影咗一啲相。斟茶環節完晒之後，我哋仲去烏溪沙影咗一個鐘左右。雖然喺烏溪沙只係一個鐘左右，我哋都影咗好多相，都唔知點解，其實咁早開始到嗰陣應該都好攰，但係影吓影吓大家都好enjoy所以都唔覺攰！ 到晚宴嗰時自己就比較忙，又要換衫、march in其他各樣，就少咗同佢哋交流，不過我記得佢哋有喺旁邊不停咁幫我哋影相。到睇成長片段嗰時，我真係覺得好滿意，因為我有一啲特別嘅要求而佢哋都幫我哋做到晒。有啲要求例如我好怕啲成長片段好長，又hard sell浪漫，而特別怕就係聽到播返讀結婚誓詞「我，XXX，…」嗰啲，真係覺得咁做非常過氣！另外就係，我之前又見過有啲片入面影返朝早啲嘢嗰時，啲閃光燈勁多响到閃，而片段後來都播晒啲閃光出黎！呢點我哋都幾驚會係我哋到發生，所以當我見到我哋段片完全無以上呢啲嘢就真係好開心！條片感覺好柔和，節奏應快得快，時間掌握得啱啱好！(播得長嘅話啲賓客都悶啦！)後來我好多朋友喺facebook都話讚條片做得好靚。總括黎講，我哋覺得佢哋好叻掌握唔同嘅場地，喺咁多個唔同嘅地方都完全唔使摸索就已經幫我哋影到好靚嘅角度，成隊crew又好nice，好滿意呀！