我哋揀Royal Plaza就係因為佢喺旺角，我哋本身都係諗住喺旺角擺酒，加上我同我先生同旺角都好有緣份，係喺嗰度開始。 我哋睇過Langham Hotel得番星願廳，個場嘅layout就唔係太啱我哋。Royal Plaza 就有三樓嘅喜鵲堂，但係臨結婚一個月佢就話有free upgrade，upgrade咗去六樓，佢都有帶我哋睇一次六樓個ballroom先處理個contract，當中係唔駛加錢。嗰位sales同事叫Katy Ma，佢好好，由第一次見佢開始已經跟得好足，無論係email定whatsapp都係好快同好詳細咁答到我，亦好有耐性。 去到擺酒當晚個經理又係好好，其實我先生同佢接觸比較多，好多rundown上兄弟姊妹同我先生要注意嘅嘢佢都好主動咁去提佢哋。本身我都安排咗time keeper，但係經理就背熟哂個rundown幫我哋做埋time keeper。當日聽番朋友講都話我先生好輕鬆，佢哋從來冇見過新郎可以咁輕鬆周圍去影相，先生之後都話全靠經理幫佢跟咗好多嘢。 食物方面我就冇咩點食，不過聽番賓客講都話好食，而且份量夠多又夠熱。 另外器材嚟講啲燈光好靚，係水晶燈，係個projector質素差少少，可能因為太大所以就朦啲同埋啲色差啲，側邊嗰兩個projector會好啲。 整體嚟講都好滿意，服務好，性格比好高!