本身酒店跟咗一間decoration house，送咗coupon俾我哋，叫M2 Decoration。我哋都上去間公司睇過，但佢送嗰啲嘢同款式真係好基本。我原本都唔想花太多錢喺decoration嗰一方面，不過睇完又覺得真係太簡單，感覺上好似啲公司春茗咁樣。我有問過嗰間公司攞啲資料，睇吓加錢會唔會好少少，但之後都係覺得佢哋公司嗰啲嘢感覺都係比較普通。佢哋service完全無問題，唔會話見你攞住coupon去就對你差啲，只係我自己唔係咁鐘意佢哋嘅設計。於是我就再上網睇吓其他公司，見啲decoration真係可以做到好靚，有拉布同printing，最後我就覺得都係出去搵另一間公司好似仲好。揀咗一輪之後，我就決定搵My Dear幫我哋做decoration。 一開始我係睇吓佢哋啲相簿，之後有個職員Gary佢好快已經同我約時間再直接傾。我上到去又覺得佢哋啲嘢都好啱心水，啲人都nice，所以都好快落咗訂。佢哋俾咗好多以前嘅作品我睇，我就再comment想要啲咩但造過新的，最後夾夾埋埋都改咗成5、6次先finalize。我覺得成個過程佢哋都好盡責，例如我同佢哋講完想改某啲地方，佢哋唔會就咁改完就算，而係會就住嗰個改動再出多2、3個version俾我睇。Gary佢真係令我覺得佢係好用心想幫你造好呢件事，完全唔會落訂前後兩個樣！"