Big Day當天，我哋搵咗Dino拍video，佢係幫我影pre-wedding同big day嘅攝影師介紹的。因為我哋就唔想要啲太煽情、太standard style嘅video，而攝影師都好老實咁同我講如果佢哋影番都係得啲大路嘢，所以我就想搵其他人影video，之後佢就介紹咗Dino俾我叫我考慮吓。我睇咗Dino其中一條片已經覺得直程係另一個層次，好有電影感。另外佢好鐘意航拍，片入面有好多航拍元素，睇落真係哇哇聲。我記得嗰條片應該係W Hotel，佢由西九一路影過去，又會有少少故事元素令到成件事好似電影咁，真係好靚，於是我就決定咗搵Dino喇。 我係結婚嗰日先第一次見Dino，中間一路都係Whatsapp溝通，我哋都好有信心，因為覺得De odd介紹得俾我哋都應該okay，所以turn out都好surprise，我哋大家都好信任對方。Big day當日佢一早就嚟咗我屋企，佢好有禮貌，一嚟到就同我哋打吓招。不過佢之後就比較少講嘢。其實攝錄師問個新人想要啲乜嘢video係多餘嘅，新人都未必會識答，反而無咁多planning仲好，隨心一啲更好。我哋都唔太鐘意啲形式化嘅嘢，所以都冇咩所謂，同埋最緊要大家互相信任，當然呢一樣就因人而異啦，可能有啲客人會prefer攝錄師問清楚有咩要求。Dino嘅observation好好，佢會大概觀察到我同我先生係咩類型嘅人﹑想要啲咩，條片出到嚟係好playful，好capture到我哋真實嘅一面! 我哋係喺Hotel Icon擺酒，可能佢未必太熟個場地，但係佢望咗一陣就已經知我哋應該點行﹑點樣攞啲光源等等。我係喺酒店度斟茶，可能個走廊會比較暗，但係佢都能夠處理到個背光嘅效果，出到嚟有剪影嘅效果。 其實big day當日我哋係有啲趕，因為要趕吉時，大家都會好緊張個timeline。不過Dino對佢嘅工作係有一份堅持，一定要拍得好啱佢個feel先得，例如喺間屋度行出黎嗰個shot行咗好幾次都影得唔啱佢心水，同埋未入嚟接新娘嗰陣佢會拍一啲side shots，佢拍咗好耐都未入嚟。我好欣賞佢呢份堅持，但係時間上可能要拿捏得好啲。雖然時間上有少少趕，但係到後來睇到條片就係覺得好值得，我哋都好鐘意條片，佢好capture到我哋兩個好playful嘅feel，個tone好夾我哋，同埋亦都有一啲必要嘅elements，例如戒指shot同感動位，成件事唔會一味好煽情咁，亦都會有啲笑位，真係一個屬於我哋嘅故事。