我上年8月左右開始搵衫，都係上網睇下啲租衫店有無1-2個款係我想租，同埋使唔使收試衫費，見有啱嘅店就mark低入list。然後，就依我最鐘意嗰1-2款或最多款我會揀到嘅店排次序，當時我嘅策略就係由最無可能租嘅店開始約時間去睇。每次我去到一間店我都會試唔同款，慢慢就知多咗自己著咩款式或顏色會比較鐘意同好睇。而我試完第四間--Moreno Bridal，就決定落訂。 我揀定Moreno Bridal嘅主要原因係老闆娘Rita真係好溫柔，去到試衫嘅成個過程都令我覺得好舒服，而且完全無hard sell，又唔會懶懶閒或你唔落訂就唔理你之類。佢好nice，唔使收試衫費，又俾咗好好嘅意見我。有一件好好笑嘅事就係我想租一件紅色晚裝敬酒嗰時著，但我又唔知應該租咩款好，於是我就問Rita佢有咩意見。佢介紹咗一件俾我試，試完之後在場全部人（當時除咗我同我老公仲有另外2 pair朋友）都覺得好靚！嗰條裙係lace魚尾，掛頸露半背嘅設計，佢仲解釋點解佢覺得好啱我係因為我鎖骨靚，而嗰條裙嘅設計係好突顯到。估唔到我big day第二日之後，我有個朋友即刻問我係邊度租裙，覺得我敬酒嗰條裙好靚。最後我嗰位朋友上完去Rita度之後就租咗同一條裙喺自己big day嗰日著，真係好誇張！ 另外我第二次上去嗰時轉咗一件背心款。嗰時我就問佢我胸骨嗰位比較大，但又好想著背心款，有無咩方法會著衫好睇啲。因為佢哋嗰度可以租埋首飾，佢就建議我戴啲面積大同吊得低啲嘅首飾可以遮一遮，結果出嚟個效果真係好好！ 我朋友今年去影prewedding要租衫我都推介咗佢去Moreno Bridal。我朋友去完都即刻confirm咗，而且Rita亦俾咗優惠我朋友。我朋友之後同我講，佢去影prewedding搞到條裙濕晒又唔小心勾穿咗少少，但Rita都無扣佢錢，真係好好人！Rita見攞完去洗之後啲lace都補得返，就無扣佢按金俾返晒佢。我覺得Rita佢真係好好，如果佢可以請返幫手幫輕下自己就好喇！我見到佢事事都要親力親為都好忙好辛苦！