Big day攝影我哋自己本身都睇咗好多間，我哋淨係睇網上啲相都唔係太鐘意。雖然我哋唔係話喺攝影呢方面好專業，但係睇得多你大概知道自己鐘意邊啲，同埋有啲可能影嘅角度或者其他嘢唔係咁好。我哋本身係揀咗兩間，其實另一間先係我哋首選，但係嗰間個態度就好似唔係好想應你咁，所以我哋就揀咗Cherriella。 第一次見Bernard都係好roughly咁傾吓，詳細情形我就唔係好記得喇，因為我哋都成年前開始同佢傾。開頭係有個女仔同我哋傾，可能俾啲相我哋睇吓咁， 當中就冇咩點sell你嘅，個過程都okay，佢會話「有啲嘢你想加就加，唔加都冇所謂」。成件事都冇咩特別話hard sell咁，因為我哋上去都幾肯定係會揀佢架喇。我哋臨結婚前一個月都再有一日上咗去，Bernard幫我哋做咗個大概嗰日嘅rundown，都幫到手嘅，因為佢俾咗個框框我哋教我哋要點做，好似嗰日大概要幾點做咩咁，所以大家記住，bigday 前見多次見面係好重要嘅！ 我自己都做過好多次兄弟，見過有啲crew染哂金毛咁，Bernard成team人出嚟望落去個感覺係好舒服嘅，幾位都係好「四正」，呢樣嘢我幾滿意嘅。過程入面例如斟茶我哋都會搵番兄弟講吉利說話，我哋就唔suppose攝影師要講嘢，so far成日佢都冇咩點講過嘢，但係佢搵嘅另一位攝影師講嘅嘢我唔係太鐘意，可能係一啲唔係好好笑嘅爛gag咁。仲有就係我爹哋唔喺度架喇，呢一點我都有同Bernard講，但係當日另一位攝影師一嚟到就嗌「爹哋爹哋」咁，呢樣我就唔係太鐘意喇，不過Bernard都有即刻提佢。。。其實講多錯多，建議佢哋講嘢都係睇清楚情況會好啲。 時間上佢哋就真係控制得好好嘅，本身我都預係會有少少超時，所以租車都係租到兩點半，點知我哋又真係啱啱好兩點五番到去，所以唔駛再加錢，時間控制真係唔錯。有一樣嘢佢做得幾好，就係朝早我哋兄弟好甩鏕，有啲兄弟未訓醒，有啲又遲到唔見電話咁，變咗朝早就影唔切相，去到男家嗰邊先補影番，但係咁樣補影之下啲時間都冇話會overrun咁。 執相方面佢即晚執嗰啲其實我哋已經好滿意，執出嚟同影出嚟都係我哋鐘意嘅效果，so far我都覺得好okay。當晚係有早拍晚播，我又唔敢話條片係好特別，但我睇完會笑又會覺得okay幾好睇。講番就係我太太好鐘意video裡面首歌，係蔡健雅嘅"Beautiful Love"，我太太其實未聽過但就好鐘意。當時留意到一播片既時候我太太同啲朋友都喊，真係配得好好，好感動。。。諗返都好奇怪，其實大家本身都冇溝通過隻歌，但係就係咁啱觸動到我太太。