一開始要搵big day攝影師嘅時間，我主要都係上網睇吓。我哋無搵返prewedding同一間公司，因為想試吓其他風格。之前我哋搵另一間公司影咗overseas prewedding，不過我哋覺得效果只係一般，所以就想試吓搵另一間影big day。嗰時我都睇咗好多，之後就target咗三至四間個風格係自己比較想要嘅嘢，然後去見過嗰啲攝影師。見過幾個攝影師之後，我覺得Johnathan俾我哋個感覺好專業。佢會有自己嘅見解同諗法，呢樣嘢我覺得係好重要。另一個我好欣賞佢嘅地方就係佢唔包朝拍晚播嗰部分。我哋都問過好幾個其他攝影師通常都有包埋，但佢就話佢識幾個專門做片幾好嘅可以介紹我哋，不過佢自己就真係唔做，因為都係想專注喺影相唔想分心，我哋反而好欣賞佢呢份專心同專業。 整個交談過程都好順利，佢唔會hard sell，亦都好肯同我哋傾嘢。雖然我哋唔係搵佢影prewedding，只係搵佢影big day，但傾開嗰時佢都有分享一啲佢之前幫其他客人影嘅prewedding相俾我哋睇。我哋睇完真係幾impress，因為覺得好難得喺香港影到咁嘅相，睇落氣氛完全唔似香港有嘅景色。其中我比較有印象嘅係一張喺元朗水塘同枯樹附近度影嘅相，嗰張相影出嚟真係好靚，完全唔似喺香港影！ 我哋big day喺6月，大約係12月左右confirm Johnathan。由我哋同Johnathan傾完到big day都meet過2次，期間都一直有同佢溝通，問佢攞意見。因為我哋男家嗰一邊喺酒店租咗間房，佢都有幫我哋分析如果想省啲時間就為女家都喺附近租一間酒店房出門用，又有同我哋講吓啲利弊，我覺得都好幫到我哋。之後我哋亦有傾吓big day 中間啲時間出去外拍嘅細節，只可惜最後當日好大雨，完全出唔到去影。 到big day嗰朝第一眼見到隊crew，覺得佢哋好精神又著得好整齊。佢哋同我哋打咗招呼之後就好自動咁去set嘢，感覺都好pro。接新娘前，我同班兄弟都影咗啲相，我覺得佢都好細心，每一個兄弟要點企同埋個樣望邊一邊，佢都逐個逐個教，嗰朝影相都玩得幾開心。我哋覺得佢做嘢好認真同好專注，每一個pose佢都睇得好細緻。不過time management 上面可能佢真係要注意一下，我哋都明佢係想影得好靚，但如果捉返準啲時間就比較好。因為始終wedding都好多事要處理同埋啲時間比較緊迫，影相嗰部分時間一耐咗就再郁之後啲schedule。希望佢之後可以盡量維持攝影質素但又濃縮到時間就更perfect喇！例如佢思考擺位、執位、放燈嗰啲時間可以快少少已經會係好好嘅進步！ 嗰日天氣好惡劣，非常大雨，所以只可以喺一間幾細嘅酒店房嘅廳度影相，唔可以出去外拍。不幸中之大幸係朗廷酒店嗰間酒店房有啲湖水藍色，幾夾我啲兄弟同姊妹衫，影相效果都唔錯。我最驚喜嘅係估唔到喺一間咁細嘅房Johnathan都影得出好靚嘅相。其中幾張佢用咗wide鏡，又教我點企，影出嚟我對腳睇落長咗唔少，睇返我都覺得幾開心。仲有一張我老婆同姊妹團影嘅相我覺得好靚，唔似一般香港wedding style。其實我哋只係喺酒店房個廳嘅一張梳化度影，但佢影出嚟就有一種外國宮廷嘅感覺！真係好靚！另外，嗰晚佢同我啲親戚都好打成一片，晚宴完咗之後佢同我啲親戚朋友仲留咗喺度傾吓計飲2杯，真係好難得！ 雖然未收返晒啲相，但我睇咗朝早影嗰啲相都覺得好滿意（因為啲相用嚟做朝晚播）。我同我老婆或者都會諗諗遲啲搵Johnathan喺香港再影post wedding都未定！