媽咪諗住買金器俾我，但又驚買咗我唔啱，就叫埋我一齊去咗旺角度買，始終買金器都係去啲有大店好似比較有保障，所以我哋行晒周大褔、周生生同六褔。不過睇完周大褔同六褔後，就覺得佢哋嘅金器比較chunky，啲款又比較成熟啲，於是就決定去周生生。我覺得周生生啲款比較young，好似其中一隻我買咗嘅有花嘅金戒指就比較特別，喺其他店好似都無見到。不過其實就算係周生生，都會間間啲款都會有啲唔同，始終都係間間都要入去睇吓。最後我哋喺彌敦道嗰一間周生生入面買。 店員嘅銷售手法都主要係用價錢抵唔抵賣嚟做selling point，都係俾啲好實際嘅產品資訊，例如幾重幾錢嗰啲。我哋主要係睇咗一條金鏈，一對龍鳳鐲同一隻金戒指。我哋講完話都係去隔離格吓價先，佢哋就走個經理出嚟講話俾折扣。雖然都覺得好似有啲push我哋，但見價錢都啱又行到攰，就喺嗰度一次過買晒。