一年前本身我係搵另一間嘅攝影公司影big day，嗰時都諗住confirm晒喇都冇問題啦，點知臨結婚前一個月出現咗少少爭拗，有一啲溝通上嘅問題，我哋要嘅嘢佢做唔到，又唔肯refund，最後搞到好唔愉快，變咗到最後一個月嗰陣我就要再出去搵另一間。我有兩個朋友都搵過Bernard影wedding，就介紹咗Bernard俾我。嗰時我都知得番一個月都比較趕，好彩Bernard知道我成件事都非常之好咁將佢本身諗住休息嘅空檔留俾我幫我，又非常之好咁分析晒所有情況我聽，都盡量做到我想要嘅嘢俾我。 我哋一開始係透過whatsapp聯絡，佢都有解釋過個package我知話我知係包啲咩，亦都問咗我需要啲咩先，之後好快第二日已經約上去見佢喇。佢本身weekend都好忙，但係都抽時間同我哋見面。第一次見佢就覺得佢都幾down-to-earth同埋friendly，佢趕住番嚟開門同我哋傾，都有同我哋講聲唔好意思咁。佢都冇咩點話去sell我，都係一嚟就問我大約想要啲咩style，嗰時我冇一個好clear嘅idea，反而係叫佢俾啲意見我哋，佢就show咗佢一啲之前嘅portfolio俾我哋參考，都睇咗好多唔同嘅style，亦都有我哋滿意嘅style。佢都有盡量幫我哋諗，問咗我哋喺邊度擺酒，全日流程等等，佢都俾咗好多意見我哋，個過程都唔係hard sell係舒服嘅。最後我哋都即刻confirm咗，因為佢影相嘅style都係我哋鐘意，同埋佢都會盡量滿足我哋request嘅嘢。最後睇埋個價錢，都做到我哋想要嘅嘢，所以就confirm咗。 離big day當中都係得一個月時間，Bernard好efficient連成長片段都幫我做埋。我第二日已經send晒啲相俾佢整，佢都好快俾到段片我。然後見面當日我都有ready咗個rundown俾佢睇過，佢都已經即時俾到好多comment我，我都同佢夾咗revise咗，所以都好smooth。我原本都冇expect過佢會幫我做埋個成長片段，但係佢話呢個係佢哋個package包咗佢哋有責任做埋，所以我都好impressed。不過關於成長片段就有啲蝦碌嘢，可能真係因為太趕，佢又有幾個job跟緊，可能就有少少typo，串錯我個名同埋將我先生個名變咗另一個名，佢都不停咁講唔好意思，態度都好好，最後改咗兩次，不過都係好minor架啫，唔係咩大問題。 到咗big day當日，一開始我木哋係有少少混亂，因為接新娘嗰間房已經好多人，我哋朝早schedule又趕。不過混亂之間佢哋都識得分工，有啲人幫我影親戚，有啲人影金器，係有啲亂但係都清楚見到佢哋都會有分工。當日親朋好友對Bernard overall嘅comment係非常之好。我有好多親戚，所以當時都有啲逼同亂，佢哋都好有耐性咁幫我逐批逐批慢慢影。我有一個親戚好鐘意拎部手機出嚟影相咁，佢哋都好好咁讓個位俾佢哋影咗先，然後佢哋自己再影咁，唔會話面露不悅，或者係催住佢哋快啲咁，好有耐性。敬茶嗰陣佢哋講啲吉利說話都係非常之好，在場所有親戚聽到都非常之開心。Overall全日影相我啲親戚都覺得佢哋好professional，同埋都覺得佢哋影出嚟啲相好靚。 當日我哋都有出去外面外攝，其實我都有特別request佢哋影架花車嘅，都想影低出門追車咁，但影出嚟都有困難。當時Bernard都有同我哋分析過，但係最後都幫我哋做到。出去外拍嘅location佢哋都俾咗好多advice我哋，所以最後都揀到一個影出嚟係靚嘅地方，原本我都淨係諗住去1881影，但Bernard都同我分析過話會好多人影出嚟可能會有人頭同埋路人甲，都有叫我哋考慮其他地方例如觀塘海濱公園或者係郵輪碼頭，啲景會靚啲同埋空曠啲，最後我哋都聽咗佢意見去郵輪碼頭。當日其實都好熱，但係佢哋都 趴晒地又彎晒身幫我哋影。最深刻係有一個位我哋企喺個水池中間，Bernard想攞個好啲嘅角度就成個人趴喺池邊，差唔多成塊面浸晒落水拗晒腰先影到嗰個shot，佢都係take咗個risk整濕部機去幫我哋影。不過，可能影outdoor嘅時候有啲嘈，而佢哋又比較斯文，有時就會聽唔清楚或者唔係好知要點擺pose，如果可以大聲少少就更加好！ 當晚我大部分時間都係換衫化妝，所以佢大部分時間snapshot都係影我先生或者朋友，佢啲snapshot影出嚟都好自然同埋捕捉嗰個時間都好好，大家好開心笑緊咁。 整體嚟講，真係十分滿意！