我朋友結婚時我陪佢上去butterfly試過衫，佢哋Studio環境舒服乾脆企理。我覺得佢哋嘅衫都靚，而且好乾淨，直頭係香噴噴！連嗰時幫我影相嘅攝影師都讚佢哋啲衫好乾淨。 間店係Stephanie同佢先生開嘅，而Ruby應該係佢哋嘅助手。我覺得其實Ruby已經好好，但Stephanie仲好，佢真係一個好sweet嘅女仔。佢哋唔使收我試衫費，雖然一開始話最多試3套衫，但佢見我覺得好想試，就同我講俾我試多件。之後佢見我揀咗某一件，佢又會攞一件佢覺得更靚嘅問我會唔會想試埋。佢哋完全唔會係好strict咁話「唔得喎，只可以試3件！」，而且又唔會同我講錢，話試多件要加錢之類。反而係我問佢如果再試使唔使加錢，佢就話「唔緊要呀，下一個booking嘅客人都未到，你覺得啱嘅可以再試吓！」我覺得佢哋真係好好，會好真心咁幫客人，唔介意你真係試到啱為止。試完身之後佢哋會幫我改衫，到攞衫時都要試完啱先俾你走。我覺得佢哋改得好啱身，著起上嚟好舒服。 我覺得佢哋太低調喇！一間咁好嘅店真係應該要俾多啲人知！！