我哋結婚戒指揀Cartier因為佢嘅永恆性，本來我都係諗住揀自己鐘意嘅戒指，但係入到Cartier嗰吓就知道佢背後嘅寓意係永恆嘅愛情，所以我就再睇吓喇。我自己揀嗰隻戒指就唔係啲好fancy或者好螺絲型嗰啲，我就買咗佢傳統少少嘅白金有Cartier石嘅戒指。 我係喺銅鑼灣利園買嘅，開頭都怕如果入到唔買又黑你面。不過，原來我入去嘅時候又冇呢個感受，D sales並唔係想像中嘅嚴肅，而且揀嘅過程都舒服。Serve 我嘅sales都好friendly，當中我都試咗幾隻，但係我揀唔到色，我唔知玫瑰金好定銀色好，又有粗又有幼咁啦，咁佢都幫我又唔介意我煩，仲可以笑住咁serve我。最後我同先生都揀咗對traditional啲架啦，佢又冇特別sell我，因為嗰對戒指都唔係特別特別貴嗰啲嚟，算係中價啦。其實我戒指size係較為細，佢都好friendly咁同我講話「你睇吓想要邊隻啦，如果再細就可能要訂造架喇！」成個過程，佢都解釋得好好，當中可能有啲因素我冇考慮到，即係會唔會有時工作要除番出嚟呀，佢都話會影響個size咁，我覺得都幾窩心嘅，因為有啲嘢係我自己唔會諗到。 戒指呢啲嘢通常都會諗一諗再買，左諗右諗咁，但係當日我就即刻買咗，咁啱又有我size又唔駛特別訂造。佢都有得俾我揀訂造細半碼，但係有樣嘢幾好，就係你隻戒指攞咗番去三個月如果有啲咩問題你可以拎番番去，即係俾你試吓戴住o唔okay先，再刻字嗰啲。所以我喺嗰度係有兩次唔同嘅service，第一次就係我買，佢好好咁幫你包起又提你你有coupon，記住攞去用喇；第二次去到就係刻字喇，去到刻字佢哋又會幫我諗，都係刻initial，但係我同我先生一個美國番嚟一個英國番嚟，就算我哋寫date都會有唔同寫法。個sales都冇覺得我哋兩個煩，有啲位就係例如個initial刻咗落去用一點定用一格，佢都俾咗好多建議我哋，都唔會介意我哋問佢邊樣好啲，佢都有幫到我哋。另外，佢都寄過兩張卡俾我，有佢親手寫嘅生日卡，第二張就係恭喜我哋準備結婚，都真係幾估唔到!