我哋結婚嘅紅酒杯、簽名簿、簽名筆都係Tiffany！不過要講我哋同Tiffany嘅緣份，就要由8年前講起。嗰時我老公去買過一隻戒指送俾我，就認識咗喺圓方Element間Tiffany嘅一個staff叫Wendy。 8年前嗰次我好記得，因為咁啱情人節就係年初一，我哋一齊去咗泰國旅行，佢就送咗隻戒指俾我。嗰時起其實我都已經當咗佢喺我老公，所以都唔係好介意擺唔擺酒嘅問題。總之旅行完返到香港後，就再返咗Tiffany度，因為隻戒指嘅size唔係好fit。之後我就講笑話「咁就算架喇？」，估唔到佢竟然喺兩個月後送咗另一隻戒指俾我，又係喺Tiffany度買，第二隻係方形的，亦都係由嗰時開始就同Wendy熟咗。 到咗舊年決定要結婚，我哋就再去搵Wendy，結果佢搵咗成7個月，終於幫我搵到一對我哋好鐘意嘅求婚戒指，仲要係2月14日收到。我覺得佢真係好細心，又好用心去幫我哋不停咁去搵。後來Wendy 轉咗去 IFC店我都有同佢 keep in touch, 仲做埋好朋友，連我婚禮嘅司儀都係搵佢做，所以我哋成個婚禮不單止有好多Tiffany theme嘅嘢，連個MC都要係from Tiffany 既！：）