我Big day嗰化妝師叫豆豆，佢係男仔嚟嘅。其實之前朋友結婚係搵佢化妝，我已經覺得佢化啲妝好自然，同埋set啲頭都好靚，當時已經諗住自己結婚搵佢架喇！ 試完妝後，各樣嘢都好合我心意，所以都好快就confirm咗。佢都冇話好hard-sell，佢話我可以選擇試妝先，又或者俾完deposit先試妝都okay，depends on我咁。當日試妝佢都係根據我想要啲咩就盡量化，化完之後又話「唔緊要架你番去考慮吓先啦，你鐘意先再confirm啦」，唔會點樣push我。 到咗big day當日見到佢，佢係好企理，好準時就要早到添！本身約佢五點半，佢五點一二已經到咗酒店，叫佢食少少嘢先驚佢餓親，佢都冇食，跟住就好professional咁拎啲嘢出嚟幫我化晒先自己再出去買嘢食。我事前都有send個rundown俾佢睇，佢都跟得好足嘅，就冇話點overrun呀各樣嘢，咁但係佢overall係有少少慢，因為始終佢一個人做嘢，而又好仔細同埋要好完美先收貨，所以就會慢少少，可能到夜晚我都想出去同啲guest影吓相，但係因為要set頭呀各樣嘢就變咗冇咩時間去互動。我當晚係有三套衫嘅，我原本都冇expect過每換一套衫佢會幫我set一次頭，但係佢每次都堅持幫我換。我好滿意佢啲造型，係個個都讚，佢都有同我講番話好多人問佢攞咗咭片! 到最後俾錢佢都冇收到我extra，俾咗張單我list晒呢個for咩嘢嗰個for咩嘢咁，所有嘢都好老實。 佢同其他化妝師唔同嘅就係會同你傾計令你個人冇咁緊張，同埋會真係好尊重你嘅意見，例如佢去到一個位會問你「呢度o唔ok呀」﹑「呢度想唔想咁樣咁樣」，佢會make sure整出嚟你會鐘意。然後佢又會幫你諗你套衫襯啲咩嘢，你個樣又襯啲咩嘢，所有嘢都幫你諗得好仔細。搵男化妝師同女化妝師分別其實唔大，但係男反而好似仲細心啲咁。我上網都有睇過啲comment係話男仔化妝師化出嚟會比較自然啲，女仔有陣時反而會重手咗。我唔知係豆豆個人比較細心，定係overall嚟講係咁啦，但係唯一唔方便就係換衫嗰度，可能就要另外搵人幫你就要花多少少時間。