搵場地其實真係唔易，唔親身去個場地睇吓係唔會知個感覺點樣。主要係要近返自己2邊家人（我哋啲家人主要都係九龍灣嗰邊），同埋睇圍數。我唔想因為圍數少要間場，覺得一邊擺酒，隔住塊板就有其他人喺隔離食飯會好奇怪。另外就係想要個場地有鋼琴，因為想彈隻歌俾老公聽，俾surprise佢。話明surprise, 睇場嗰時我當然冇同我老公講明呢樣啦！ 最後去到mega box嗰邊間御苑皇宴見到有我想要嘅嘢，唔使間場，價錢都合理，所以就confirm咗。Mega Box分店有海景廳同園景廳，不過因為我圍數比較少，所以只係可以揀海景廳，係一個橫向嘅場地。另外，因為我擺嗰日都係旺嘅日子，佢哋都唔俾園景廳嗰邊間開用。 其實一個場地有好多經理，但上到去比我遇到個好嘅經理都算係我用呢個場地嘅其中一個原因。幫我哋嘅經理叫Fanny，佢唔會係咁sell，只係用一張list好清楚咁講晒你聽係包啲咩。當然我哋budget有限，都會問吓有無嘢可以送，佢見都可以接受的話都會有商量，感覺幾好。之後佢哋帶我哋去睇場，都會講吓啲音響同燈光到時會點，又俾另一個list我哋，同我哋講到幾時要預備好啲咩資料俾佢哋，佢哋嗰邊就會點安排，都好清楚。咁啱我wedding嘅一個月前佢個主舞台換咗地氊，我都係臨尾上去傾細節時先見到。雖然同之前啲色唔同，但感覺grand咗，都幾開心。 不過，Big day其中一個問題係音樂唔係好夠大聲，因為嗰日喺平日，一開始未有太多賓客到，音樂細聲嘅時候就顯得個場好冷清。另外，個場地喺唔同嘅位有啲平面電視用黎播婚紗相。但可能因為電視比較細，所以作用就唔大，啲客人都無乜留意。不過佢哋之前都講過話可能台隔離啲LED display會偏色，所以唔建議喺大display播。至於講起大舞台本身有嘅LED monitor，可能有啲片格式佢哋唔support，所以我哋自己整嗰條片到嗰晚出時就有啲偏紅色。我諗如果我早啲攞上去俾佢哋睇可能都可以執執，但我之前又無諗起可能會出呢種問題。 至於我嘅彈琴surprise，我彈咗林依晨嘅「池塘」俾我老公聽，因為我覺得好表達到我對我老公嘅感覺。當晚啲staff都好配合我，因為個琴唔喺主舞台，佢哋要幫我使走我老公，等我可以換完衫後喺琴嗰邊出現俾個surprise佢。其實之前上去傾嘢時我已經同D員工講咗我想做呢件事，佢哋都好幫手，唔會Say no，話可以到時傾吓大家點配合。當時我都仲未諗到可以點使開我老公，係Fanny主動提議到時去搵我老公傾啲嘢引開佢。後來我問返我老公，佢話Fanny當時好似係同佢傾吓啲紅酒數啱唔啱，幾多個客人要泊車之類，就成功咁使開咗佢～！到我出場，我啲朋友司儀就好配合，所以成功俾到呢個surprise我老公，都好開心。之後睇返我姊妹拍嘅片都覺得嗰個moment幾sweet，整體都算係好順利嘅晚宴。