（聯邦郵輪宴會中心） 我去聯邦擺其實係一個巧合。其實開頭係同老公係揀咗Mega Box 御苑皇宴，臨想上去俾錢嘅時候佢同我講半個鐘之前俾人book咗，佢俾埋個電腦我睇。我哋睇咗場先，睇完覺得OK先去俾錢，見到俾人book咗我同我老公都呆哂，我哋已經係年半前去book。佢仲要同我講book嗰個唔係婚禮係event，我相信佢自己都好揼心，佢都好唔好意思，不過我哋都冇辦法，擇咗日子一定要嗰日。 於是我同我老公好down咁喺婚禮場哋遊咗一段時間，後尾就見到聯邦，都係九龍灣。其實之前我仲睇過其他，睇過宏天廣場百樂門，我對嗰度有興趣啲，因為嗰度場哋都大，樓底又高。我當日仲未知道有呢一間。我問過百樂門嗰邊，個台咁高，後面個backdrop其實有幾大，因為個backdrop好似好細，個台好似好大，跟住個呀姐答我：「我冇度過喎唔知喎！」我問佢咩佢都好似答唔知咁，我心諗：「有冇搞錯呀！」跟住對呢間酒樓完全失哂信心，同埋啲呀姐有少少大陸口音，溝通唔到，梗係即刻走啦！ 之後我哋諗住走，就俾我哋見到聯邦，諗住坐低聽下啦。知道佢哋原來九龍灣有個新嘅場，個場係啱啱新起幾個月。佢俾啲片我哋睇都係流片嚟，因為個場好新。後尾我哋見到個場哋咁大咁闊就俾佢吸引住，轉個頭就落咗訂。我哋本身諗住一定要睇咗實場先決定，但唔知點解好似鬼掩眼咁，同埋同個sales好好傾，所以好快就落咗訂，不過到我結婚半年前再聯絡酒樓就發覺個sales冇做喇。好彩之後接手嗰個都ok，冇話令我好擔心。 其實我結婚前幾個星期都知我結婚當日下午有另一個booking，佢哋未傾掂都已經預早通知我，可能下晝俾唔到新娘房我，到confirm咗都有同我解決問題。因為佢哋對面兩間餐廳都係佢哋，就offer喺餐廳俾間工作房俾我化妝，我話睇一睇先啦，入到去嚇到我，間房連張麻雀檯都開唔到，我就問有冇其他哋方，好彩佢哋都肯讓間返經理房俾我化妝。 食物真係好滿意，我啲friend讚到暈。其實我老公屋企人嗰邊係做飲食行業，我知道我哋唔可以擺酒店，所以就揀一間好食啲嘅。出到黎comment好好，我啲friend扮哂食評家嗰啲都話由頭食到尾。 另外，原來出面個花園可以用嚟證婚，到臨尾一個月，酒樓就問我會唔會喺出面證婚，跟住就幫我book埋政府場地，檯檯櫈櫈搬出去嘅所有嘢都係free嘅。基本佈置佢哋就冇，不過櫈有椅套，檯有普通檯布但係唔係話好靚，如果你要就可以搵decoration公司，不過我覺得ok，所以我用咗佢哋現有嘅嘢，就唔需要加錢。我覺得足夠，如果你想好完美搵decoration公司梗係更加靚。 燈同聲嗰啲都ok嘅，不過佢哋播錯歌。我喺簽紙daddy拖住我行入去嘅時候，佢就播咗我簽紙嗰首歌。我行入去嘅時候心諗:「點解係呢首歌架，乜料呀？！」不過都冇計啦，照行，唔係可以點啫。到我簽紙嗰刻佢就播返我march-in嗰首歌。之後我都同啲friend講話播錯歌，佢哋都話奇怪點解我會用嗰首歌嚟簽紙，呢個真係一個污點>.