之前我有同事喺台灣影過Masalili，佢覺得幾好就推介俾我。於是我就上佢哋網頁睇價單，再按自己需要揀行程同落單。匯咗$8000過去做訂金之後佢哋就再聯絡我幾多號去影相。佢哋啲package無包機票，但就包酒店住宿。不過我覺得喺海外嘅部分其實真係無咩服務，好似我落咗單之後，佢哋就安排咗一個同事同我喺line溝通，但反應就比較慢。我問一個問題可能要2-3日後先覆返。同埋我覺得好奇怪，佢哋好似成日都食飯，成日我問佢哋嘢都係＂午膳中，未能回覆＂。或者可能佢哋真係太多單太忙，但係始終見唔到面又只係靠line聯絡，仲要覆得咁慢，唔多唔少都會有啲擔心。不過去到台中嗰時，一上的士同司機講想去Masalili，佢就問我哋係咪去影結婚相，所以佢哋都係一間喺台中幾出名嘅店嚟嘅。 流程方面，第一日揀衫，第二日影相，第三日揀相，都進行得好順利。我哋嘅攝影師叫Sky，個人都幾易話為。本身我哋個package係包150張相，但佢後期都幫我哋影咗180張。我哋仲擔心嗰30張使唔使加錢買，但攝影師就話︰「無所謂啊，我全部都給你的～！」我哋聽到之後真係好開心。同埋佢哋真係唔會sell你，成個流程都無咩會要你再俾錢。例如我嗰時喺網上面搵資料時見好多人話台灣啲攝影公司好興叫你加錢用「安瓶」，係幫你定妝等個妝無咁易甩，但Masalili就完全無叫我哋買呢啲嘢。我嗰朝早11點化妝影到夜晚7點，個妝都無溶過，我自己都懷疑其他公司嘅呢啲安瓶費係咪真係要俾。 揀相方面都好容易，我哋仲一揀一邊諗點解佢仲未sell我哋叫我哋買嘢。最後反而係我怕會唔會有嘢我哋要買但唔記得咗買，問返佢哋轉頭有啲咩我哋可以買。聽到我咁問就答我哋要俾我哋嘅嘢都包晒喺package入面，唔使額外付款，所以我覺得佢哋真係好老實，唔會亂咁收錢。今次喺台灣嘅服務體驗真係非常之好，我真係要俾個讚佢哋！