我個花球係喺花墟買嘅。因為我畢業嘅花球，求婚嘅花球都係喺佢哋度買。其實呢間花店係我老公喺我畢業嘅時候點指兵兵點咗佢買，求婚嘅時候佢就返返去嗰度買。我亦都有同姊妹影pre-wedding，又唔知點解我點指兵兵又係點咗呢間。到我同老公講要買結婚花球，佢就俾咗張卡片我叫我去返呢間，我行返入去就覺得好熟口面，好似pre-wedding個花球就係呢度買，老闆娘Fanny都同我講覺得我好熟口面。 佢冇catalogue嘅，佢通常都係prefer我想要咩款我話俾佢聽，但係我初初就冇咩概念，佢都suggest咗啲客人整過嘅俾相我望一望，睇下鍾唔鍾意。因為我本身鍾意多肉植物，就突然靈機一觸想用多肉植物，因為我上網睇外國係有人真係用多肉植物嚟整花球，我問佢得唔得，佢話可以，佢就幫我用繡球花整咗個花球。我揀咗粉藍色繡球花，再加咗啲多肉植物落去襯。我好似係半個月前訂，坊間嘅大牌子或者出名牌子好早之前已經要訂，同埋佢嘅價錢都相宜。束花都實淨，ok嘅。 攞花都係結婚前一日去拎，我晏晝去花店拎。因為我喺酒店出門，佢就叫我擺水養住佢，同埋因為繡球花需要好多水，要搵噴壺打少少水落去。佢其他已經提咗我帶噴壺，但係我唔記得咗，最終都係搵手彈啲水落去，但係全日都hold到都靚嘅。同埋個多肉植物而家都仲健在，因為可以拆返出嚟繼續養。 佢哋都係做花束多，嗰日啲相佢淨係喺手機俾我睇，我諗佢可以整個好啲嘅portfolio。其實婚紗店其實都係俾個iPad你自己睇，但係佢都會分返category方便客人去睇嘢，如果佢有呢個profile就會更加好。