我其實試過五、六個化妝師，仲撻過訂。而我撻訂嘅原因就係因為小蟲，因為我試完小蟲之後就發覺，個效果原來可以相差咁遠。我揀佢除咗鍾意佢個妝，第二就係小蟲本身態度都非常好，我覺得呢點好重要，因為你big day其實對住化妝師多過對住你老公好多，基本上嗰日結婚16個鐘佢係唔會離開你。咁佢都好好態度同埋真係幫到我好多，所以我對佢係超級滿意。 我係facebook搵到佢，我諗佢喺新娘化妝界都出名，都係睇facebook嘅相覺得啲妝容幾靚，啲髮型又好好，好啱自己。其實我本身已經book咗個化妝師，但係我都忍唔住去試下小蟲，end up又真係好好，所以到最後我都願意撻訂轉咗搵小蟲。同埋佢好細心，anytime你流咗滴眼淚或者你飲過水，佢都會即刻幫你補妝，真係好好。 Big day當日有個細節位，其實化妝suppose係唔包換衫，即係你換裙或者換underwear，nude bra其實係要姊妹幫手。但係嗰日佢不單只喺咁趕嘅時間入面幫我化妝set頭，佢仲要幫我換埋衫同埋戴nude bra，甚至乎我身體上有一啲需要遮瑕嘅哋方，佢都會完全一手包辦，而且time management控制得好好。變咗我啲姊妹唔需要幫我換衫，佢真係一腳踢。我覺得呢啲唔係化妝師必要做嘅，唔可以話佢唔做就係唔好，但佢真係好好。我完全冇要求佢做，但佢都幫我換衫，甚至乎佢好清楚知道著完套褂，套睡衣一定要抹哂全身，即刻拎埋濕紙巾幫我抹，呢啲都係好貼心，真係唔會個個化妝師都係咁好。我所有姊妹睇到都大讚，都話第時要搵佢。