Pre-wedding我搵左La-vie，係去日本影嘅。揀呢間之前我哋本身一早已經決定去日本影，因為男朋友喺日本讀過幾年書。其實上網搵來搵去真係好煩，而呢間公司就咁啱有兩個大學同學影過，而且呢間都係大公司，D相我又覺得okay。之後，我去婚展book，因為我同學話婚展會平少少。我主要揀佢因為佢全部都係日本嘅，我過去影相只係帶咗一對絲襪同束褲，衫﹑鞋同埋攝影師都包，相反如果我搵我個big day攝影師Ivan影，就要同佢confirm一個時間一齊去，仲要自己帶衫，真係煩好多。La-vie上網有啲衫款我有揀定，但去到嗰間分店佢都會有其他俾你再揀。佢係自己攝影公司嚟，香港嗰間就主要做翻譯工作。 佢哋服務都係好好，我哋影得好開心，嗰邊啲翻譯有啲人內地人台灣人，溝通上完全冇問題。當時我揀咗七月去影，佢就話如果天氣點點點有得reserve第二日，咁我就揀咗日後備係過兩日，之後影之前佢真係打俾我，個台灣人同我講︰「明天應該會下雨.....」佢都一路問譬如遲一日得唔得，我個合約寫咗遲兩日嘅，佢睇到都係會落雨都會一路同你我tun。我覺得佢呢樣嘢都好好，因為影outdoor天氣影響都會好大，佢又唔會︰「總之你合約係嗰日就係嗰日！」佢係你邊日得就即刻問番攝影師得唔得，總之一得就都係就我地同埋就天氣，因為如果原本嗰日真係落雨落足全日，但係我之後影嗰日就好好。 景點方面係佢哋提議，不過都有問我有冇地方想影，我哋就話冇啦，佢就俾咗好多sample我地睇，咁之後我哋就揀咗幾個。同埋有啲景點係要加錢嘅 (例如神户淡路島)，跟住佢有個日本人staff喺度，佢又同我男朋友講日文，講完一輪又唔洗加錢喎，佢話︰「呢個要加錢，不過free俾你！」我知道婚展係會有啲咁嘅offer，除咗個package平少少啲景點佢又會俾埋你。淡路島嗰度係超靚，係好多花花草草彩色咁，影出嚟都真係好震撼! 之後又有去神户港Harbor Land影。 我哋一開始係想揀北海道嘅，因為暑假影薰衣草靚，其實北海道仲貴啲。不過佢哋就同我講話北海道交通冇咁方便，點到點好遠，可能要凌晨四點起身，又驚好多遊客，佢就話不如影神户，佢俾好多資料我地睇，睇睇吓又覺得okay，覺得okay我哋就決定去神户影。 佢哋做嘢好快手，啲相好好，個攝影師我又好鐘意，佢係日本人，叫Tsukasa San。佢個package係俾我指定攝影師嘅，之後我就指定咗佢。我覺得佢同Ivan有個共通點，係會影吓戒指飾物影吓背脊咁，有啲意境，因為我好怕張張相影到好似喺金紫荊咁又大頭close up。