我喺Facebook度搵到呢間公司，查過forum都知佢係比較新嘅公司，但見佢啲reference係走簡約風同埋覺得同自己嘅品味比較似，就諗住都試一下。佢哋都唔算平，我覺得比起其他公司都貴約20%。 佢哋一開始都講咗會Big day前三個月先會開始Design，但我個人就比較心急，所以confirm前我已經問佢哋可唔可以早啲開始喺四個月前就開始design。我見佢哋都同意之後我就confirm，之後我就上去佢哋公司同佢哋briefing。大約2個星期左右，我諗都差不多有draft睇，就問佢哋有無啲嘢睇吓。起初我主要係用facebook chat同佢哋溝通。但好多時我問完啲嘢，佢就話佢去問吓同事先，然後通常就無回頭覆我，又咁等多咗幾日。到終於有first design睇，點知就同我哋喺佢哋度買嘅帖款差不多一模一樣。我哋係喺佢哋度買咗佢哋design嘅帖款，但backdrop就係custom made款。之前同佢傾嘅時候我仲整咗個power point reference佢，仲特別額外俾錢，就梗係想要個新design！我即刻反映返咁唔得喎，佢就話個designer誤會咗，以為係想align返成件事，結果就要再等過新design。期間我都再俾咗好多reference同色板佢，但點知我俾咗粉紅色佢竟然出咗藍色俾我！ 到後期，我就要佢俾個contact我，等我可以搵負責我張單嘅人嚟問，因為次次facebook chat度問都唔知同邊個講緊嘢，又話要搵同事check check先。之後先終於開咗個Whatsapp group嚟傾。其實原本佢係話可以無限次改，但基本上每一次改都要1個星期先再覆，所以都係limited嘅次數。去到差不多尾嘅時候，有某個design我見到好似有啲位白咗，就自己用啲software補返話希望佢做到類似咁。點知佢覆返我話一郁嗰度就成個layer再做過，再2個星期後先可以改完。我心諗一開始出個design都1星期，點解補返嗰個位反而要2星期呢？！但係Designer就企得好硬，話係要改2個星期架喇。嗰時2個星期後就已經係到production時間，所以如果真係要改2星的話即係到時點我都要硬食。我又怕同佢反面佢哋唔知會做咩，於是就打電話去用軟攻，講自己真係為咗呢單嘢好唔開心。之後佢就話再幫我去傾傾，最後就過咗幾日就改咗俾我。 其實結果出嚟大家都覺得靚，但係個過程就真係好辛酸。佢哋啲嘢真係靚，但唔知點解真係極不responsive。我之前睇過都有人話唔知佢係咪人手少，所以唔係太應人。