呢間鋪喺金都，我喺呢間整花球，佈置都係搵佢哋。 因為我喺彩福欣宴擺，佢個場嘅台面地氈係紫色，唔想啲相易出嚟暗，就想整個地氈白色。本身我淨係想整地氈，不過佢個package一定係包埋backdrop，咁就join咗。佢都有好多款式揀，揀T & M係因為佢哋比較pro啲，因為我哋有睇過其他佈置公司，嗰啲公司乜都話得，做乜都得！但係又冇相睇，價錢又平，太平反而令我冇信心。而且T & M有做過彩福呢個場嘅佈置，有相俾我睇，感覺好似實在啲，安全感大啲，不過佢哋就貴啲。 佢哋都有好多款式俾我揀，不過最後做出嚟係同我揀嗰張相有偏差。本身我揀個背景係有紫花，係喺我個名牌中間個位有個正方形嘅絲花，絲花咗右兩邊好似成梯形咁有啲紫花，一路伸延出去，結果做出嚟啲紫花係冇伸延出去，淨係圍住咗啲絲花旁邊，集中咗喺中間。因為當時得我同老公知道本身個設計應該係點，同埋佢哋整緊嗰時我又忙住化妝，老公又忙緊其他嘢。到我睇到嗰時佢哋都已經走咗，根本就冇人同我溝通過，都冇人打過招呼。我會覺得係有啲貨不對辦；佢整出嚟都係靚嘅，但係始終唔係我心目中揀嘅嘢！ 我覺得佢哋做好咗，應該去問下主人家O唔OK先走，唔係做完就自己走，有少少失望！