我哋去New Beauty做美容係因為之前做婚檢，佢哋叫我哋去試做一次trial，咁諗住唔洗錢就去試下。佢哋當時係新開，係Miki 譚小姐serve我。本來開頭都冇諗住買嘢，咁最後我覺得OK就買咗$9,000療程，係做五次機嘅facial。佢就話我臨結婚嗰個月就送多次貴facial俾我，話值成萬蚊。我開頭都覺得ok，因為做機通常都貴，同埋佢哋打開門口咁大間公司，又係上市，$9,000就當等塊面靚啲。 我係12月嗰時第一次做，到2月我先做第二次，佢哋就問我洗唔洗keep吓個身型，收下hip位，話俾我試下。試嗰時我冇著衫，佢就喺度幫我整，又話唔會扣時間，當時真係有啲肉在針板上嘅感覺。本身都諗住唔買，後尾都係買咗，諗住做完10次，結婚之後都唔會再見到佢哋。嗰張單就單$19,000，前前後後用咗$48,000。 佢哋嘅效果例如去水腫係ok，但係佢哋銷售手法係有問題。不過佢哋都有customers service係抽樣打電話問返我意見，我都有反映返，佢哋都接受，話會同佢哋前線同事講返。其實我第一次上完去，佢有打嚟問返我點，我都有俾返分。對上我度完蜜月返嚟佢都有打嚟問，我都冇諗住投訴，不過反映返佢俾佢。同埋我都擔心佢哋會唔會知我投訴佢哋定點，我前幾日上去佢哋都冇特別點對我，呢一點我覺得ok。 除咗銷售手法，佢哋booking都可以再改進。因為我有一次3月頭明明book咗星期五放咗工去，佢哋之前不嬲都會早一日send短訊，但係我嗰次又收唔到。到嗰朝打去問，原來佢哋話冇同我落booking，但係對上一次做完我係即刻book咗。又要等兩個星期先有期，但係我月尾都已經結婚，我就問佢哋係咪呃我。理論完之後星期六下午就有期。我俾咁大舊錢，其實都係想有效果，冇理由開頭就拍哂心口可以做到，但係到真係又做唔到。