其實我睇咗好多間酒席，其中有啲負責酒席嘅員工對婚禮流程根本唔熟悉，真係愈傾愈唔對路！！聽Maggie講就真係make sense 啲，講得好清晰，聽得出佢好熟悉成個流程，覺得Maggie根本就係我哋嘅 Wedding Manager！ 佢哋嘅服務態度真係好好，無論係其他部門嘅同事，定係big day當日幫我嘅同事，甚至係妹妹都好好，feel到佢哋唔係想交貨咁簡單，而係好有熱誠，好想做好成件事！例如經理會就住rundown俾意見我哋，佢態度好好，好有耐性咁同我講，就算我哋有唔同嘅意見，佢都無任何唔好嘅面口，好有禮貌，好尊重我！而Big day當晚，好多親戚朋友都讚個經理好好，全場幫我打點。就連婚宴嘅waiters都好有禮貌，如果係其他酒樓/酒店，好多時賓客未食完已經開始收嘢，或者啲碗碟會「bang bang」聲，但我聽返黎嘅feedback都好好，所以都send咗個email去讚揚個經理！另外，負責同我開會嘅Natalie都好好，感覺到佢係好投入佢嘅工作，佢會不斷提我係時候要開會，同埋亦有提醒我哋好多婚禮嘅細節。因為我wedding有舞獅時間，佢就特別安排時間俾我哋rehearsal一次。喺rehearsal過程中，我見佢係仲肉緊過我！而big day當晚幫我嘅妹妹Karen雖然比較新，不過佢真係好有熱情，而且講嘢時好溫柔，燥底嗰陣聽到都舒服啲！佢仲成日同我講：「有咩幫到你啊？我喺新娘房出面等你啊，你唔洗急啊，我去做啲嘢先等陣返黎啊～！」我覺得佢好有交帶！ 至於場地環境方面，個場好靚，樓底又夠高，而且啲燈光都好靚，感覺好舒服，地方好得體。我擺咗32圍，後面都仲有位俾我放咗兩隻獅子！不過新娘房就比較窄，地氈比較舊，但我覺得整體嚟講，呢個價錢得到呢個服務已經超值！另外，音響方面，其實宜家好多地方都係就咁插手指就得，但佢哋仲用緊dvd/cd，而當晚有啲相可能因為技術上既問題播唔到，如果佢哋可以更新吓啲音響設備就更加理想！不過我覺得呢啲都唔係大問題，因為佢哋每個員工都咁熱心，已經覺得自己好有福氣！ 當晚我哋成11:30先散，但佢哋都冇催我地交場。我真心多謝一班用心的員工，令我結婚前一路都無擔心過任何野，我覺得真係好難遇到呢啲咁好嘅團隊！因為佢哋實在太好，我婚後都介紹holiday inn俾我啲朋友！