我係PolyU畢業嘅，加上我擺33、34圍，一黎要搵翻咁大嘅場仲要冇柱選擇唔多，二黎都係因為Poly畢業所以揀Icon。之前我冇去過呢度飲，但我聽翻朋友啲feedback都okay嘅，所以一開始睇場睇左佢，同埋一兩間酒店，但最後都係好快就揀左呢度。負責安排我地睇場嘅同事Emmy真係好好，講解得好清楚，而個ballroom 無柱位有咁靚，我哋都決定俾訂。我就話我哋係 Poly 舊生，問佢會唔會有多啲優惠，佢話都有，不過點都唔夠婚展多㗎喇，Emmy佢叫我哋 hold 住唔好俾訂住，話如果我哋遲啲等婚展俾訂會再優惠啲，再送多啲嘢俾我哋！咁我哋就等到婚展再去探佢，佢又真係再送多啲嘢俾我哋。個package好好，送啲用得著嘅野，所以就覺得佢比其他酒店好。佢以前有舊生優惠嘅，不過唔夠去expo抵。 我真心想讚下Emmy，佢真係好好，跟得好足。佢好到我哋結曬婚，第二日下晝掛八號風球嘅，我哋還曬衫，佢仲問我哋係邊，請我哋係Icon下面個café食龍蝦同牛排，因為佢知道我哋忙到唔得閒食野。佢問我哋肚唔肚餓，叫我哋入去飲啲野食啲野。 Big day當日整體黎講好好。通常係話對新人梗係好啦，但so far問翻身邊啲親戚朋友嗰晚feedback佢哋都讚嘅，好多出面酒店都係炒散，其實佢哋通常用翻自己學生，或者佢哋相熟嘅人，所以冇人bad comment話佢哋serve得唔好，尤其斟酒佢哋係唔吝嗇嘅。 如果佢哋唔加咁多價錢，我哋到時生小朋友擺百日宴都會翻去㗎！