(彩福皇宴 - 佐敦店) 一開始諗擺酒就諗擺酒店定酒樓。因為我哋只擺11圍同唔想咁貴，我哋就決定搵酒樓。 搵酒樓過程當中，我哋都去婚禮展睇過唔少。另外，我自己都去過好多地方飲茶，覺得酒樓當中佐敦嗰間彩褔個景真係最靚，加上佢個場又無柱位，所以都唔駛點諗就決定揀彩褔。決定好之後我哋就再上彩褔度傾，佢哋經理Christine幫我哋介紹場地，好多細節都講解得好清楚。 擺酒前佢同我哋開過幾次會，傾下菜單同婚宴流程嗰啲，Christine都解釋得好仔細，就算唔係office hour我whatsapp度問佢一啲嘢佢都好有耐心答我。特別想提嘅就係婚宴前一晚，我哋上去放定一啲嘢喺新娘房預備婚宴嗰晚用，我竟然大頭蝦到連套婚紗都放埋喺新娘房，但套婚紗我其實婚宴前影outdoor相嗰時要著！嗰晚好夜成11點幾我先記返起呢件事，真係即刻急死我！我不停咁諗點算好，係咪要叫啲兄弟早啲幫我過去攞定係點好，但係新娘房鎖住又唔知有無人幫佢哋開門。於是我咁夜都只好whatsapp Christine問佢點算好，佢即刻就答我「無問題！雖然嗰陣我未開工，但我會幫你同其他同事交低，到時你啲兄弟隨時上去同佢哋講要入新娘房攞返套婚紗，佢哋就會開門俾啲兄弟，咁就可以幫你攞到套婚紗。」我真係好多謝Christine佢咁幫忙，當時真係亂到都唔知點算好！ 食物方面，因為之前我奶奶都同我哋講佢聽人講過話彩褔擺酒啲嘢好食，所以我哋就揀咗彩褔最貴一圍嗰種plan。雖然婚宴我都好忙唔得閒食嘢，我食到嘅野都唔多，但我有食到嗰啲都真係好好食！連我啲賓客feedback都話覺得嗰晚啲野好好食，仲好食過出面啲酒店嘅婚宴，個個都讚好！環境方面，以佢喺酒樓黎講真係數一數二好，因為佢樓底高仲要無柱位！雖然我哋只係擺咗11圍喺細廳，但佢都俾到高樓底嘅廳我哋，唔會係好似就咁用板幫你間開嗰啲細空間。服務方面都好好，佢啲人嘅服務真係超級專業又任勞任冤。佢哋係咁遞水俾我飲，又自動自覺處理埋杯上面啲唇膏印。佢哋仲有2個姐姐成晚跟住我不停咁幫我整返靚條裙同裙尾，等我影出黎啲相都好靚好整齊，連伴娘都可以輕鬆影相，真係超好超體貼！ 我覺得彩褔真係超級好，我自己都推介咗俾一啲就快結婚嘅朋友。如果個scale可以俾到5.5分，我一定俾5.5分彩褔！